Qyzylorda polıtsııasy pırotehnıkany qoldanýdyń qaýipti tustaryn atady

QYZYLORDA. KAZINFORM — Jańa jyl merekesi qarsańynda pırotehnıkalyq buıymdardy satý men qoldanýǵa baqylaý kúsheıdi. Osy oraıda Qyzylorda oblystyq polıtsııa jáne tótenshe jaǵdaılar departamentteri turǵyndardy qaýipsizdik talaptaryn saqtaýǵa shaqyrady.

Jańa jylda pırotehnıkadan qansha adam zardap shekti
Foto: Pixabay

Mamandardyń aıtýynsha, pırotehnıkalyq buıymdardy turǵyn úıler, avtokólikter men tez tutanatyn nysandardyń mańynda paıdalaný órtke, túrli jaraqatqa jáne basqa da qaıǵyly jaǵdaılarǵa ákelýi múmkin. Ásirese, balalardyń mundaı zattardy óz betinshe qoldanýy qaýipti.

Qyzylorda polıtsııasy pırotehnıkany qoldanýdyń qaýipti tustaryn atady
Foto: Óńirlik kommýnıkatsııa qyzmeti

— Pırotehnıkany tek mamandandyrylǵan saýda oryndarynan satyp alýǵa, ónimniń sertıfıkaty men jaramdylyq merzimin tekserýge keńes beremiz. Buıymdy iske qospas buryn nusqaýlyǵyn muqııat oqyp, qaýipsiz qashyqtyqty saqtaý qajet. Pırotehnıkany jabyq ǵımarattarda, balkondarda, ǵımarattardyń shatyrlary men qasbetterinde, sondaı-aq buqaralyq is-sharalar ótetin oryndarda paıdalanýǵa bolmaıdy. Jumys istep turǵan buıymdy qolda ustaýǵa, biltesi óship qalǵan jaǵdaıda qaıta tutatýǵa jáne iske qosylǵan ónimge birden jaqyndaýǵa tyıym salynady, — dedi oblystyq polıtsııa departamentiniń basqarma bastyǵy Erdáýlet Jaýkeeev.

Ákimshilik quqyq buzýshylyq týraly kodekstiń talabyna sáıkes eldi mekenderde pırotehnıkalyq buıymdardy belgilengen tártipti buza otyryp qoldanǵany úshin 20 aılyq eseptik kórsetkish mólsherinde aıyppul salynady.

— Al pırotehnıkalyq zattardy saqtaý jáne satý tártibin buzǵany úshin jeke tulǵalarǵa 5 AEK, shaǵyn kásipkerlik sýbektilerine 10 AEK, orta kásipkerlik sýbektilerine 15 AEK, iri kásipkerlik sýbektilerine 45 AEK kóleminde aıyppul qarastyrylǵan. Budan bólek zańsyz saýda jasaǵany úshin 25 AEK mólsherinde aıyppul kózdelgen. Kámeletke tolmaǵandar quqyq buzǵan jaǵdaıda zańda belgilengen tártippen olardyń ata-analary nemese zańdy ókilderi jaýapqa tartylýy múmkin, — dedi Erdáýlet Jaýkeeev.

Eske salaıyq, Petropavlda «Pırotehnıka» respýblıkalyq jedel-profılaktıkalyq is-sharasy aıasynda saýda oryndary tekserilip jatyr.