Qyzylorda polıtseıleri ınternet alaıaqtyqpen aınalysqan kıberqylmystyq topty ustady

QYZYLORDA. KAZINFORM - Qyzylorda oblysynyń polıtseıleri ınternet alaıaqtyqpen turaqty aınalysyp, qazaqstandyqtarǵa asa iri mólsherde zalal keltirgen qylmystyq topty ustady.

Oblys prokýratýrasy men polıtsııa departamenti birlesip «IT-TERGEU» jobasyn júzege asyryp jatyr.

«Osy maqsatta arnaıy jedel tergeý is-sharalar júrgizý barysynda ınternet alaıaqtyqpen turaqty aınalysqan qlymstyq top qolǵa tústi. Olar jábirlenýshilerge asa iri mólsherde zalal keltirgen. Qylmystyq toptan aıǵaq zat retinde 16 dana uıaly telefon, birneshe qoldanylǵan sım kartalar, «Roýter» qurylǵysy jáne 3,5 mln teńge aqsha alyndy. Kúdiktiler Qyzylorda oblysynyń áleýmettik jelini paıdalanýshylaryna «Nesıe tarıhyn jańǵyrtyp, aqsha alýǵa baǵdarlama jasaımyz» degen jalǵan aqparat taratqan. Sol arqyly ózderiniń ınternettegi IP-mekenjaıyn, aqsha túsirgen banktik esepshotyn búrkemelep, jábirlenýshilerden jalpy 45 mln. teńge aqshany alaıaqtyq jolmen jymqyrǵan degen kúdikke ilindi», - dep málim etti Qyzylorda oblystyq polıtsııa departamentinen.

Vedomstvo málimetinshe, tergeý sotynyń qaýlysymen kúdiktilerge eki aıǵa «kúzetpen ustaý» bultartpaý sharasy sanktsııalandy. Qazirgi ýaqytta qylmystyq is boıynsha qajetti tergep-tekserý áreketteri júrgizilýde.

Eske salsaq, budan buryn Qyzylorda qalasynda esirtkini jarnamalaıtyn 50-den astam graffıtı-jazýlary joıyldy.