Qyzylorda oblystyq sadaq atý federatsııasynyń basshysy taǵaıyndaldy

ASTANA. KAZINFORM — Qyzylorda oblystyq sadaq atý federatsııasynyń jańa basshysy bolyp belgili kásipker, «Qaısar» fýtbol klýbynyń ıesi Islamǵalı Qozbaqov taǵaıyndaldy.

Qalanyń sol jaǵalaýyndaǵy «Qaısar» stadıonynda oblystyq sadaq atý federatsııasynyń jańa basshysyn saılaýǵa arnalǵan arnaıy jıyn ótti.

Oǵan QR Ulttyq sadaq atý federatsııasynyń prezıdenti Azamat Ósimbekov, oblystyq dene shynyqtyrý, sport jáne týrızm basqarmasynyń basshysy Bahtııar Artaev, sondaı-aq jergilikti buqaralyq aqparat quraldarynyń ókilderi qatysty.

Jıyn barysynda QR Ulttyq federatsııasynyń ókilderi oblystyq Sadaq atý federatsııasynyń jańa basshysy retinde belgili kásipker Islamǵalı Aıtýaruly Qozbaqovty tanystyrdy.

Qatysýshylar tarapynan jańa kandıdatýra qoldaý taýyp, nátıjesinde atalmysh federatsııaǵa jańa basshy saılandy.

Aıta keteıik, Memleket basshysynyń tapsyrmasyna sáıkes, kásipker Islamǵalı Aıtýaruly qazirgi tańda jergilikti «Qaısar» fýtbol klýbyn basqaryp otyr. Endigi kezekte ol óńirde olımpıadalyq sport túrlerine engizilgen sadaq atý sportyn jetildirýge jáne onyń kásibı sıpatyn arttyrýǵa kúsh salmaq.

Sonymen qatar, 11 myń oryndyq jańa stadıon «Kaysar Arenada» sadaq atý úıirmesi ashylyp, óz jumysyn bastady. 

Eske salsaq, budan buryn Qyzylorda oblystyq grek-rım, erkin jáne áıelder kúresi federatsııasynyń prezıdenti taǵaıyndaldy.