Qyzylorda oblystyq aýrýhanasynda 10 myńǵa jýyq ota jasaldy

QYZYLORDA. KAZINFORM — Kópbeıindi Qyzylorda oblystyq aýrýhanasynda joǵary tehnologııalyq medıtsınalyq kómektiń birneshe túri kórsetiledi.

Aýrýhananyń baspasóz qyzmeti habarlaǵandaı, ótken jyly munda 20 myńnan astam naýqas em qabyldady. 1 baýyr, 5 búırek transplantatsııasy jasaldy. Dárigerler jýyrda ǵana oblysta alǵash ret bir kúnde úsh naýqastyń búıregin aýystyryp, olardyń ómirin saqtap qaldy. Sondaı-aq byltyr aýrýhanada 10 myńǵa jýyq ota sátti oryndaldy.

— Oblystyq densaýlyq saqtaý basqarmasynyń qoldaýymen aýrýhana zamanaýı medıtsınalyq qural-jabdyqtarmen tolyqty. Sonymen qatar medıtsınalyq mekemeniń 5 dárigeri Germanııa, Reseı jáne Belarýs memleketterinde biliktiligin arttyrdy, — delingen habarlamada.

Aýrýhananyń akýsherlik bóliminde bir jylda 1677 sábı dúnıege keldi. Onyń ishinde 36 egiz jáne 1 úshem bar. Al jansaqtaý jáne jańa týǵan náresteler patologııasy bóliminde 623 nárestege medıtsınalyq kómek kórsetildi. 

Aıta keteıik, Qyzylorda oblysynda sońǵy úsh jylda densaýlyq saqtaý salasyna 441 mlrd teńge bólingen.