Qyzylorda oblysynyń polıtsııasy jol apattaryna sebep bolatyn jáıtterge nazar aýdardy

QYZYLORDA. KAZINFORM – Qyzylorda oblysynyń tasjoldarynda bıyl 7 aıda 62 jol-kólik oqıǵasy bolyp, 31 adamnyń ómirin qıdy. Sonymen qatar 118 adam zardap shekti.

Qaıǵyly jáıtterdiń aldyn alý úshin oblystyq polıtsııa departamentiniń patrýldik polıtsııa qyzmetkerleri profılaktıkalyq jumysty kúsheıtti. Sonyń biri Qarabutaq - Qyzylorda - Shymkent tasjolynyń boıynda uıymdastyryldy.

– Tártip saqshylary júrgizýshilerdi kóliktiń tehnıkalyq jaǵdaıymen qatar óz densaýlyǵyn da baqylap otyrýǵa shaqyrdy. Sebebi jol apattarynyń kóbi júrgizýshilerdiń sharshaýy men saqtyq sharalaryn elemeýinen bolady. Ásirese, túngi ýaqytta demalmaǵan, sharshaǵan kúıde kólik júrgizetin júrgizýshilerdiń qarsy jolaqqa shyǵyp ketýi saldarynan soqtyǵysýy jıilegen. Sondyqtan júrgizýshiler ara qashyqtyqty saqtaýǵa, jyldamdyqty asyrmaýǵa, sharshaǵan jaǵdaıda mindetti túrde demalýǵa, jol qaýipsizdigi talabyn qatań oryndaǵandary jón. Qyzmetkerler sharshaý deńgeıin anyqtaý úshin olarǵa medıtsınalyq tekserýden ótýdi usyndy. Júrgizýshilerdiń jolaýshylar men júk tasymaldaý erejelerin saqtaýyna, kólik quraldarynyń tehnıkalyq jaı-kúıine, sondaı-aq qajetti ruqsat qujattarynyń bolýyna nazar aýdardy, - delingen habarlamada.

Polıtsııa profılaktıkalyq is-sharalar joldaǵy qaıǵyly jaǵdaılardyń aldyn alýǵa, jol apattarynyń sanyn azaıtýǵa múmkindik beredi dep esepteıdi.

Al 11–13 tamyz aralyǵynda Qyzylorda qalasynyń aýmaǵynda jol-kólik oqıǵalarynyń aldyn alý maqsatynda «Balabaqsha» jedel profılaktıkalyq is-sharasy ótti.