Qyzylorda oblysynyń pedagogteri sýdy únemdeýge úndeıtin ekologııalyq ertegiler ázirledi
ASTANA. KAZINFORM - Qyzylorda oblysynda pedagogter arasynda uıymdastyrylǵan úzdik ekologııalyq ertegi ıdeıasy baıqaýynyń qorytyndysy jarııalandy.
Baıqaý Sý resýrstary jáne ırrıgatsııa mınıstrligi, Oqý-aǵartý mınıstrligi, «Sý resýrstarynyń aqparattyq-taldaý ortalyǵy» KEAQ, Frantsýz damý agenttigi (AFD) jáne ıÝNISEF qoldaýymen júzege asyrylyp jatqan «Sý jáne bilim» jobasy aıasynda uıymdastyryldy.
Baıqaýǵa 200 pedagog qatysty. Qyzylorda oblysynyń pedagogıkalyq qaýymdastyq ókilderinen quralǵan komıssııa 7 jeńimpazdy anyqtady. Olarǵa aqshalaı sertıfıkattar men arnaıy syılyqtar tabystalady:
• Qaınar Aısulý Bolatbekqyzy - Qyzylorda qalasyndaǵy M. Dúısenov atyndaǵy №15 mektep-lıtseıi;
• Ospanova Uldaı Temirhanqyzy - Aral qalasyndaǵy J. Ábdirashev atyndaǵy №62 mektep-lıtseıi;
• Altaeva Álııa Ibragımqyzy - Qarmaqshy aýdanyndaǵy №121 mektep;
• Abdramanova Aıgúl Baqytjanqyzy - Qyzylorda qalasyndaǵy A. Baıtursynuly atyndaǵy №211 mektep;
• Júsipbaeva Elvıra Suńǵatqyzy - Qyzylorda qalasyndaǵy T. Rysqulov atyndaǵy №222 mektep-lıtseıi;
• Kenjegaraeva Aqbota Nurlybekqyzy - Qyzylorda qalasyndaǵy Abaı atyndaǵy daryndy balalarǵa arnalǵan úsh tilde oqytatyn arnaıy synyptary bar mektep;
• Abdýhojaeva Raıhan Bekturǵanqyzy - Qyzylorda qalasyndaǵy B. Momynbaev atyndaǵy №278 IT mektep-lıtseıi.
Jeńimpazdardyń ıdeıalary negizinde balalarǵa, pedagogter men ata-analarǵa arnalǵan jeti ekologııalyq ertegiden turatyn «Tamshynyń saıahaty» serııasy ázirlendi.
Ertegilerde ózender, kólder men bulaqtardyń mańyzy, sýdy tıimsiz paıdalanýdyń saldary jáne sýǵa uqypty qaraýdyń qarapaıym erejeleri baıandalady.
Ertegilerdiń sıýjetteri ulttyq dástúrlerge, halyq danalyǵyna jáne qazaq ańyzdarynyń elementterine negizdelgen. Serııa Y. Altynsarın atyndaǵy Ulttyq bilim akademııasynda retsenzııadan ótti.
-Ertegilerdi bilim berý jáne tárbıe jumystarynda, onyń ishinde «Adal azamat» biryńǵaı tárbıe baǵdarlamasy aıasynda paıdalaný josparlanyp otyr. Perspektıvaly baǵyttardyń biri - «Oqıtyn ult» ulttyq jobasy. Bul bastama balalardyń kitap oqýǵa qyzyǵýshylyǵyn arttyrýdy ekologııalyq aǵartýmen jáne ulttyq qundylyqtardy dáripteýmen ushtastyrýǵa múmkindik beredi. Osylaısha sýǵa uqypty qaraý balaǵa túsinikti oqıǵa arqyly jetkizilip, úıdegi kúndelikti daǵdyǵa aınalady, - dedi «Sý resýrstarynyń aqparattyq-taldaý ortalyǵy» KEAQ basqarma tóraǵasy Qaıratǵalı Haırýlla.
Osyǵan deıin sý únemdegenderdi qoldaýǵa 214,6 mlrd teńge bólinetini týraly jazdyq.
