Qyzylorda oblysynyń memlekettik organdarynda jumys rejımin buzýdyń 65 deregi tirkeldi
QYZYLORDA. KAZINFORM – Qyzylorda oblysynda shilde-tamyz aılarynda memlekettik organdarda jumys ýaqyty rejıminiń saqtalýyna monıtorıng júrgizildi.
QR Memlekettik qyzmet isteri agenttiginiń oblys boıynsha departamenti jergilikti atqarýshy organdarda zań talaptaryn buzýdyń 18 deregin anyqtady.
- Memlekettik qyzmetshilerge 32 saǵat 8 mınýt demalys ýaqyty berildi. Al qashyqtan júrgizilgen monıtorıngke 21 memlekettik organ qamtyldy. Onyń ishinde 6 memlekettik organda 47 zań buzý faktisi anyqtaldy. Nátıjesinde 155 saǵat demalys ýaqyty berildi, - delingen habarlamada.
Monıtorıng aqparattyq, baqylaý jáne basqarý júıeleriniń, memlekettik organdardyń deregi, BAQ pen áleýmettik jelilerdegi jarııalanymdar negizinde júrgiziledi.
- Demalys kúnderi jumysqa shyǵý qajettiligi týyndaǵan jaǵdaıda ol basshynyń tıisti sheshimi negizinde aldyn ala resimdelip, jumysqa shyǵý sebebi, merzimi jáne qyzmetkerdiń atqaratyn mindetteri naqty kórsetilýi tıis. Demalys kúnindegi jumys ýaqyty belgilengen tártippen esepke alynyp, qyzmetkerge zańnamada kózdelgen tártippen demalys ýaqyty nemese ózge de tıisti ótemaqy berilýi qajet, - delingen habarlamada.
Buǵan deıin biz Memlekettik qyzmet isteri agenttiginiń BQO boıynsha departamenti tarapynan oblystyq jergilikti atqarýshy organdarda jáne olarǵa qarasty uıymdarda júrgizilgen profılaktıkalyq monıtorıng nátıjesin jarııaladyq.
