Qyzylorda oblysynyń medıtsınasynda qandaı mamandar jetispeıdi
QYZYLORDA. KAZINFORM — Kazinform tilshisi anyqtaǵandaı, Qyzylorda oblysynda aımaqtyq dárigerlerge suranys joǵary.
Tapshylyq qala men aýylda birdeı baıqalady.
— Osy ýaqytqa deıin reanımatolog kóbirek jetispeıtin, búginde bul tapshylyq seıildi. Aýdandarǵa akýsher-gınekologtar asa qajet. Emhanalarda balalar hırýrgi, ÝZI-ge túsiretin jáne aımaqtyq dárigerler jetispeıdi. Sondyqtan keıde eki aýylǵa ortaq bir ýchaskelik dáriger jumys isteıdi. Jas mamandardyń kópshiliginiń tar býyndy maman biliktiligin alýyna baılanysty ýchaskelik dárigerlerge suranys joǵary bolyp tur. Jylda medıtsınalyq oqý oryndarymen túlekterdi jumysqa qabyldaý jóninde ýaǵdalastyq jasaımyz. Soǵan qaramastan áli de jetispeýshilik bar. Jergilikti bıýdjet esebinen oqytylatyn dárigerlerden bólek óz erkimen jumysqa keletin dárigerlerdiń sanyn kóbeıtýge týra keledi, — dedi oblystyq densaýlyq saqtaý basqarmasynyń basshysy Almas Ábilpatta.
Maman tapshylyǵyn azaıtý maqsatynda óńirge óte qajet medıtsınalyq mamandyqtar boıynsha 197 rezıdent, jalpy tájirıbeli dáriger mamandyǵy boıynsha 190 bilim berý granty bólindi.
— Keıingi eki jylda eldi mekenderge barǵan asa tapshy 14 jas mamanǵa jergilikti
bıýdjet esebinen júz eselengen eń tómengi jalaqy mólsherinde, ıaǵnı 8,5 mıllıon
teńgeden birjolǵy járdemaqy tólendi. Bıyl memleket kómegin 10 asa tapshy mamanǵa
berý josparlanyp otyr. Bul sharalar óz kezeginde 2-3 jyl kóleminde salany dárigerlermen tolyǵymen qamtamasyz etýge, tar býyndy mamandar tapshylyǵyn
meılinshe azaıtýǵa múmkindik beredi, — dedi basqarma basshysy.
Eske salaıyq, Qyzylorda oblysyndaǵy statsıonarlarda kún saıyn eresekterge 70, balalarǵa 30 túrli ota jasalady.
