Qyzylorda oblysynyń kreatorlary Astanadaǵy jármeńkede 12,1 mln teńgeniń ónimin satty
ASTANA. KAZINFORM - 12-13 qyrkúıek kúnderi Astanadaǵy Qazaq Creative Hub alańynda respýblıkalyq Creative Aimaq jobasy aıasynda Qyzylorda oblysynyń kreatıvti ındýstrııalar jármeńkesi ótti, dep habarlaıdy QR Mádenıet jáne aqparat mınıstrliginiń baspasóz qyzmeti.
Eki kúnde jármeńkege 4,9 myńǵa jýyq adam bardy.
Jalpy óńir kreatorlary 12,1 mln teńgeniń ónimin satty. Kreatıvti jármeńkede ulttyq mýzykalyq aspaptar, kilemder men kartınalarǵa suranys joǵary boldy.
Sondaı-aq zergerlik buıymdar, ulttyq kıimder, aǵash pen súıekten jasalǵan zattar jáne basqa da avtorlyq ónimder satyldy.
Jármeńkede kreatıvti ındýstrııanyń 21 baǵyty boıynsha ónimder men jobalar tanystyryldy.
Qyzylorda Hub-tyń tsıfrlyq ázirlemeleri men óńirdegi zamanaýı medıa jobalar da kópshilikke usynyldy.
Jármeńke aıasynda «Anaǵa taǵzym» kreatıvti ındýstrııalar ortalyǵynda ázirlengen Syr Style Collection sán toptamasynyń tanystyrylymy ótkizildi.
Atalmysh toptamada ulttyq naqysh pen zamanaýı dızaın úılesim tapqan. Baǵdarlama aıasynda ulttyq qolóner boıynsha sheberlik sabaqtary ótip, kontserttik baǵdarlamalar men sán kórsetilimi uıymdastyryldy.
Kópshilik «Altyn dombyra» jáne «Kúmis dombyra» sekildi biregeı mýzykalyq aspaptardy jáne óńirdiń kórnekti tulǵalaryna qatysty tarıhı-mádenı jádigerlerdi tamashalady.
Jármeńke Qyzylorda oblysynyń shyǵarmashylyq áleýetin keńinen tanytyp, jergilikti sheberler men dızaınerlerdiń ónimderine degen suranystyń joǵary ekenin kórsetti. Sonymen qatar óńirlik brendterdi ilgeriletýge múmkindik berdi.
Osyǵan deıin Astanada Qyzylorda oblysynyń kreatıvti ındýstrııalar jármeńkesi ótip jatqany týraly jazdyq.
