Qyzylorda oblysynyń qarjy únemdeý tájirıbesi respýblıkalyq deńgeıde tanystyryldy
QYZYLORDA. KAZINFORM — Úkimet basshysy Oljas Bektenov Qyzylorda oblysynyń qarajatty tıimdi paıdalaný tájirıbesin respýblıkaǵa úlgi retinde qoldanýdy tapsyrǵan bolatyn. Osy oraıda, Qyzylordada áleýmettik salaǵa baǵyttalatyn bıýdjet qarajatyn tıimdi paıdalaný týraly respýblıkalyq semınar-keńestiń sektsııalyq otyrysy ótti.
Bıýdjet qarajatyn tıimdi paıdalaný, únemdeý baǵytyndaǵy jumystar men qabyldanǵan sharalar týraly oblys ákiminiń birinshi orynbasary Danııar Janalınov, oblys ákiminiń orynbasary Meırambek Shermaǵambet baıandady.
Bıyl oblys bıýdjeti 823 mlrd 400 mln teńgege jetip, 2022 jyldan beri 226 paıyzǵa ósti. Onyń 477 mlrd 600 mln teńgesi (58%-y) áleýmettik salaǵa bólindi.
Sońǵy 3 jylda bilim, mádenıet jáne sport salalaryna bólingen qarjynyń maqsatty jumsalýyna júrgizilgen monıtorıng qorytyndysymen birqatar shyǵys yqshamdaldy. Qarjylyq zańsyzdyqtyń aldyn alýda naqty sharalar qabyldandy.
Balabaqshalardaǵy memlekettik tapsyrystyń tıimdi ıgerilýin 2023 jyly qoldanysqa engizilgen «Feıs-baqylaý» mobıldik qosymshasy arqyly baqylaý múmkindigi týdy, ıaǵnı jalǵan tirkelgen balalar anyqtaldy. Sonymen birge 2023-2025 jyldary mobıldik qosymsha arqyly balalardyń kúndelikti balabaqshaǵa kelýi qadaǵalanyp, emhananyń jalǵan anyqtamalaryn, negizsiz demalys kúnderin anyqtaý esebinen 41 mlrd teńge únemdeldi.
Orta bilim berý salasynda birinshi kezekte mektepterdegi synyp jıyntyqtary men oqýshylardyń tolymdylyǵy zerdelendi. Eki jylda 76 synyp jıyntyǵynan 968 mln 900 mln teńge yqshamdaldy.
Mektep dırektorlary jumysty óz dárejesinde oryndamaǵandyqtan, saǵat bólinisinde kemshilikterge jol bergendikten, tolyq emes júktememen eńbek etetin adam sany 5000-ǵa jetken. Tolyq emes júktememen eńbek etetin 975 shtattyq birliktegi 3762 pedagogtiń máselesi sheshimin tabýyna baılanysty 6 mlrd 200 mln teńge únemdeldi.
Sondaı-aq 7 bastaýysh, 7 keshki mekteptiń jelisi qysqartylyp, jyl saıyn 720 mln teńge kóleminde únemdeledi.
Atqarylǵan sharalar jáne basqa da shyǵystardy qaıta qaraý nátıjesinde jalpy 15 mlrd 600 mln teńge yqshamdaldy. Budan bólek, suıyq otynmen jylytylatyn 198 bilim berý mekemesine 1 jylǵa qaralatyn 5 mlrd teńgeniń maqsatty jumsalýy da qatań baqylaýda.
Sońǵy úsh jylda 7,8 mlrd teńgege 24 mektep kúrdeli jóndeýden, 2,6 mlrd teńgege 79 mektep aǵymdaǵy jóndeýden ótti. Oǵan qosa 22,9 mlrd teńgege 6 mektepke qosymsha ǵımarat, 12 jańa ǵımarat salyndy.
Bilim berý mekemeleri 3,5 mlrd teńgege pándik kabınet, ınteraktıvti panel, LED ekran jáne robot qurylǵylarmen qamtyldy, 2,1 mlrd teńgege qaýipsizdikti qamtamasyz etý, ıaǵnı beınebaqylaý júıeleri, týrnıket, dabyl núkteleri ornatyldy, 861,6 mln teńgege jylý júıeleri jańartyldy. «Keleshek mektepteri» ulttyq jobasy aıasynda ashylǵan mektepter men basqa da jańa nysandardy ustap turý qarjysy jyl basynda bekitilgen qarjyny ońtaılandyrý arqyly júzege asyrylyp jatyr.
Balalarǵa arnalǵan shyǵarmashylyq jáne sporttyq tapsyrysty qoldaýǵa 2021-2025 jyldarǵa 28,6 mlrd teńge qaralyp, 12,6 mlrd teńge ıgerildi. 2023 jyldan beri 13 mlrd teńgesi, bıyl 9,6 mlrd teńge bólinip, onyń 6 mlrd teńgesi bıýdjetke qaıtaryldy. Qalǵan 2,7 mlrd teńge máslıhat sheshimimen oblystyq bilim basqarmasyna aýystyryldy, 1 maýsymnan biryńǵaı memlekettik tapsyrys pılottyq jobasy iske asyrylyp jatyr.