Qyzylorda oblysynyń dıqandary egistiktiń 98%-yn sýardy

ASTANA. KAZINFORM — Qyzylorda oblysynda aýyl sharýashylyǵy qajetine josparlanǵan sýdyń 90,5%-y alyndy, dep habarlaıdy Sý resýrstary jáne ırrıgatsııa mınıstrligi.

Búgingi tańda óńir boıynsha jalpy sý alý kólemi 3,03 mlrd tekshe metr, al josparlanǵan kórsetkish — 3,35 mlrd tekshe metr. Qalǵan 9,5% sý sýarý maýsymy aıaqtalǵanǵa deıin alynady. Qazirgi ýaqytta oblysta sý bes magıstraldyq jáne úsh sharýashylyqaralyq kanal arqyly kezekpen berilip jatyr. Búginde óńirdegi egistikterdiń 98%-y kezekpen sýarylyp jatyr. Qyzylorda oblysyndaǵy egistik alqaptaryna sý berýdi jaqsartý maqsatynda Sý resýrstary jáne ırrıgatsııa mınıstrligi men Tótenshe jaǵdaılar mınıstrligi ırrıgatsııalyq kanaldarǵa jyljymaly sorǵy qondyrǵylaryn ornatý jumystaryn júrgizdi. Barlyǵy 324 agregat ornatyldy.

— Qyzylorda oblysyndaǵy «Qazsýshar» fılıaly jergilikti dıqandarmen sý berý boıynsha 1 015 kelisimshart jasasty. Qazir óńirde mınıstrliktiń jumys toby sýarmaly sýdyń ádil bólinýine monıtorıng pen turaqty baqylaý júrgizip jatyr, — dedi Sý resýrstary jáne ırrıgatsııa birinshi vıtse-mınıstri Nurlan Aldamjarov. 

Eske sala ketsek, Qazaqstannyń ońtústiginde vegetatsııa kezeńi bıyl 20 kúnge erte bastaldy. Buǵan joǵary temperatýra men jaýyn-shashynnyń bolmaýy sebep boldy.