Qyzylorda oblysynyń bıýdjeti 851 mlrd teńgeden asty

ASTANA. KAZINFORM — Qyzylorda oblysynyń ákimi Nurlybek Nálibaev áleýmettik-ekonomıkalyq damý barysyn baıandady jáne bıýdjet qarajaty qalaı únemdelgenin aıtyp berdi. 

Ákimniń aıtýynsha, bıylǵy 11 aı qorytyndysy boıynsha barlyq negizgi makroekonomıkalyq kórsetkishtiń ósimi baıqalǵan. Jalpy óńirlik ónim kólemi 3 trln 100 mlrd teńge.

— Jyl qorytyndysymen 3 trln 700 mlrd teńgege jetkizip, 6,5% ósimdi qamtamasyz etemiz. Oblysymyzdyń bıýdjeti 851 mlrd 300 mln teńge bolyp, 2021 jyldan beri 246% ósti. Onyń 56% nemese 477,6 mlrd teńgesi áleýmettik salaǵa baǵyttaldy, — dedi Nurlybek Nálibaev elordada Ortalyq kommýnıkatsııalar qyzmetinde.

Óńirdegi damý bıýdjetiniń kólemi 2021 jyly 47 mlrd teńge bolsa, bıyl 207 mlrd teńgege jetip, 4,4 esege artqan.

Sonymen birge, bıýdjet qarajatyn ońtaılandyrý maqsatynda 2022 jyldan bastap áleýmettik salaǵa tereń taldaý júrgizilgen.

— Nátıjesinde 108 mlrd teńge qarjy únemdeldi. Onyń ishinde, bilim salasynan 64 mlrd 300 mln teńge, mádenıet jáne sport salasynan 15 mlrd 400 mln teńge, áleýmettik qorǵaý salasynan 8 mlrd 200 mln teńgeniń maqsatsyz jumsalýyna jol berilmedi, — dep tolyqtyrdy oblys ákimi.

Budan bólek, áleýmettik nysandardyń qurylystaryn júrgizý barysynda 20 mlrd 100 mln teńge qarjy únemdeý sharalary qabyldandy. Bul qarajat aımaqtyń eń ózekti degen máselelerin sheshýge, jańa ınfraqurylymdyq jobalardy iske asyrýǵa baǵyttalǵan.

Buǵan deıin Pavlodar oblysynyń ákimi Asaıyn Baıhanov eseptik kezdesý ótkizgen edi.