Qyzylorda oblysynyń bilim berý salasynda ýaqytsha moratorıı jarııalandy
QYZYLORDA. KAZINFORM – Búgin Qyzylordada áleýmettik salaǵa baǵyttalatyn bıýdjet qarajatyn tıimdi paıdalaný týraly eki kúndik respýblıkalyq semınar-keńes bastaldy. Onyń sektsııalyq otyrysyn Eńbek jáne halyqty áleýmettik qorǵaý mınıstri Svetlana Jaqypova ashty. Bul týraly oblys ákiminiń baspasóz qyzmeti habarlady.
Jıynda bıýdjet qarajatyn tıimdi paıdalaný, únemdeý baǵytynda atqarylǵan jumys jóninde oblys ákiminiń birinshi orynbasary Danııar Janalınov, oblys ákiminiń orynbasary Meırambek Shermaǵambet baıandama jasady. Bıyl oblys bıýdjeti 823 mlrd 400 mln teńgege jetse, sonyń 58%-y áleýmettik salanyń úlesinde. Sońǵy 3 jylda bilim, mádenıet jáne sport salalaryna bólingen qarjynyń maqsatqa saı jumsalýyna monıtorıng júrgizilip keledi. Sonyń arqasynda birqatar shyǵys yqshamdaldy. Qarjylyq zańsyzdyqtyń aldyn alýda naqty is-sharalar qabyldandy.
Balabaqshalardaǵy memlekettik tapsyrystyń tıimdi ıgerilýin baqylaý úshin 2023 jyldan beri Face-baqylaý mobıldi qosymshasy qoldanyla bastady. Osylaısha balabaqshalarǵa jalǵan balalardyń tirkelgeni belgili boldy. 2023-2025 jyldary mobıldi qosymshanyń kómegimen balalardyń kúndelikti balabaqshaǵa kelýi qadaǵalanyp, emhananyń jalǵan anyqtamalaryn, negizsiz demalys kúnderin anyqtaý esebinen 41 mlrd teńge únemdeldi.
Orta bilim berý salasynda da birinshi kezekte mektepterdegi synyp jıyntyqtary men oqýshylardyń tolyq bolýy baqylandy. Eki jylda 76 synyp jıyntyǵynan 968 mln 900 myń teńge yqshamdaldy. Mektep dırektorlarynyń jumysty óz dárejesinde oryndamaýy, saǵat bólinisinde kemshilikterge jol berýi saldarynan tolyq emes júktememen eńbek etetin adam sany 5 myńǵa jetken. Artyq shtattyq birlikter, tolyq emes júktememen jumys isteıtin qyzmetkerler sanyn qysqartý úshin jańa oryndar ashýdy túbegeıli toqtatýǵa ýaqytsha moratorıı jarııalandy. Tolyq emes júktememen eńbek etetin 975 shtattyq birliktegi 3762 pedagogtiń máselesi sheshimin taýyp, 6 mlrd 200 mln teńge únemdeldi. Sondaı-aq 7 bastaýysh, 7 keshki mekteptiń jelisi qysqartylyp, jyl saıyn 720 mln teńge kóleminde saqtalyp otyr.
Oblys ákiminiń orynbasary atqarylǵan sharalar men basqa da shyǵyn somasyn qaıta qaraý nátıjesinde 15 mlrd 600 mln teńge yqshamdalǵanyn atap ótti. Budan bólek, suıyq otynmen jylytylatyn 198 bilim berý mekemesine 1 jylǵa bólinetin 5 mlrd teńgeniń maqsatty jumsalýy qatań baqylaýda.
Únemdelgen qarjy bilim sapasyn arttyrýǵa ınvestıtsııa retinde qaıta quıyldy. Basqa salalarda da bıýdjet qarajaty únemdelip, yqshamdalyp, birinshi kezektegi máselelerge basymdyq beriledi.
Buǵan deıin habarlaǵanymyzdaı, bıyl 8 aıda Qyzylorda oblysynda mektepke deıingi 97 bilim berý uıymynda memlekettik attestattaý júrgizildi.