Qaıtarylǵan aktıvter: Qyzylorda oblysyndaǵy aýyldardy sýmen qamtýǵa 2,2 mlrd teńge bólindi
ASTANA. KAZINFORM – Qyzylorda oblysynyń Aral jáne Qazaly aýdandaryndaǵy 2 myńǵa jýyq turǵyny bar aýyldardy sýmen qamtýǵa 2,2 mlrd teńge bólinedi, dep habarlaıdy Úkimettiń baspasóz qyzmeti.
Baspasóz qyzmetiniń habarlaýynsha, elimizdiń óńirleri turǵyndaryn sýmen qamtamasyz etý – Memleket basshysynyń Úkimet aldyna qoıǵan basym mindetteriniń biri.
Memleket basshysynyń tapsyrmasy boıynsha Qyzylorda oblysynda alty sýmen jabdyqtaý nysanyn salý jobalaryn júzege asyrýǵa Arnaýly memlekettik qordan 2 mlrd teńgeden astam qarjy bólindi.
Jobalar jalpy Aral jáne Qazaly aýdandaryndaǵy 2 myńǵa jýyq turǵyny bar aýyldardy qamtıdy. Atalǵan sharalardy júzege asyrý Tastúbek, Erimbetjaǵa, Sháken, Shıli, Shıtúbek jáne Sarbulaq aýyldaryn sapaly sýmen qamtamasyz etýge múmkindik beredi. Jumysqa toptyq sýmen jabdyqtaý júıelerine qosý da, aýylishilik jelilerdi salý da kiredi.
Nysandar qurylysyn aıaqtaý jáne olardy paıdalanýǵa berý 2025 jyldyń sońyna josparlanǵan.
Osyǵan deıin Ulytaý oblysynda qaıtarylǵan aktıvter qarajaty esebinen 7 densaýlyq saqtaý nysany salynǵany týraly jazdyq.