Qyzylorda oblysynyń Aral aýdanynda ortalyq aýrýhananyń juqpaly aýrýlar bólimshesi ashyldy
QYZYLORDA. KAZINFORM – Qyzylorda oblysynyń Aral aýdanynda kópbeıindi ortalyq aýrýhananyń juqpaly aýrýlar bólimshesi ashyldy, dep habarlaıdy Qyzylorda oblysy ákiminiń baspasóz qyzmeti.
Baspasóz qyzmetiniń málimetterine qaraǵanda, oblys ákimi Nurlybek Nálibaev, Parlament Senatynyń depýtaty Naýryzbaı Baıqadamov, oblys prokýrory Rızabek Ojarov, pen oblystyq máslıhattyń tóraǵasy Murat Tileýmbetov, «Petro Qazaqstan Qumkól Resorsız» AQ vıtse-prezıdenti Serik Qojanııazov,zııaly qaýym ókilderi men ardagerler Aral aýdandyq kópbeıindi ortalyq aýrýhanasynyń 25 tósektik juqpaly aýrýlar bólimshesiniń ashylý saltanatyna qatysty.
Aımaq basshysy saladaǵy jańashyldyqtarǵa, halyqqa medıtsınalyq qyzmet kórsetý sapasyn jaqsartýda atqarylǵan jumystarǵa toqtaldy.
- Prezıdentimiz «Densaýlyq saqtaý júıesin damytý, eń aldymen, azamattardyń ál-aýqatyn kóterýge baǵyttalǵan. Óıtkeni medıtsınanyń deńgeıi men qoljetimdiligi – elimizdegi ómir sapasynyń negizgi kórsetkishi, – degen bolatyn.
Memleket basshymyzdyń tapsyrmasymen, Úkimettiń qoldaýymen densaýlyq saqtaý salasyn damytýǵa, halyqtyń medıtsınalyq qyzmetterge qoljetimdiligin arttyrýǵa baǵyttalǵan keshendi sharalar nátıjeli júzege asyrylyp jatyr.
Ult saýlyǵy – memleketimizdiń negizgi kapıtaly desek, baǵa jetpes qazynany qyzǵyshtaı qoryp júrgen medıtsına salasy qyzmetkerleriniń adal isin joǵary baǵalaımyz, árdaıym qurmetpen qaraımyz.
El ıgiligine tabystalatyn juqpaly aýrýlar bóliminiń jańa ǵımaraty, ondaǵy dárigerler naýqastyń dertine daýa, kóńiline raýan berip, halyq yqylasyna bólenedi dep senemiz, – dedi N.Nálibaev.
Saltanatty jıynda aýdannyń ósip-órkendeýine úles qosqan medıtsına salasynyń qyzmetkerleri men merdiger mekemeniń qurylysshylary oblys ákiminiń Alǵys hatymen marapattaldy.
Naýryzbaı Baıqadamov, Rızabek Ojarov quttyqtaý sóz sóılep, jańa nysannyń ashylýymen quttyqtady.
Juqpaly aýrýlar bólimshesiniń qurylysy qaıtarylǵan aktıvter esebinen 2,3 mlrd teńgege qarjylandyryldy. Oǵan qosa aýdandyq aýrýhana janynan «Aýylda densaýlyq saqtaýdy jańǵyrtý» ulttyq jobasy aıasynda kardıologııa jáne ınsýlt bólimsheleri ornalasqan qosymsha qurylys aıaqtalyp, halyq ıgiligine berildi. Oǵan da qaıtarylǵan aktıvter esebinen 2,1 mlrd teńge bólindi.
Keıingi ýaqytta 206 mln teńgege qural-jabdyqtar alynyp, aýrýhananyń materıaldyq-tehnıkalyq bazasy nyǵaıtyldy. Endi aýdan turǵyndary oblys ortalyǵyna nemese basqa qalalarǵa sabylmaı, syrqattanǵandarǵa mamandandyrylǵan kómek kórsetý úshin ashylǵan jergilikti jerdegi bólimshede tolyqqandy em alady.
Aıta keteıik, sońǵy úsh jylda oblystyń densaýlyq saqtaý salasyna 450 mlrd 100 mln. teńge qarjy bólinip, halyqtyń suranysyna sáıkes túıtkildi máseleler sheshimin taýyp keledi. «Aýylda densaýlyq saqtaýdy jańǵyrtý» ulttyq jobasy aıasynda barlyq aýdanda 28 medıtsınalyq nysan salyndy.
Qyzylorda qalasynda 300 oryndyq kópbeıindi aýrýhana boı kóterip jatyr, 4 aýdandaǵy ortalyq aýrýhanalar janynan qosymsha ǵımarattar ashyldy.
Ótken jyly Shıeli aýdanynda juqpaly aýrýlar bólimshesiniń jańa ǵımaraty el ıgiligine tabystalǵan bolatyn. Qyzylorda qalasynan 200 oryndyq perınataldyq ortalyq pen 500 oryndyq emhana salýǵa Úkimet tıisti qaýly qabyldady. Jaqyn kúnderi qurylysy bastalady. Budan bólek, 400 oryndyq emhananyń da irgetasy qalanady.
Turǵyndar suranysyna sáıkes sońǵy eki jylda jergilikti bıýdjet qarjysyna 225 jańa sanıtarlyq avtokólik, 45 jedel járdem kóligi alynyp, paıdalanýǵa berildi. Barlyq eldi mekendegi densaýlyq saqtaý mekemeleri arnaıy qyzmettik avtokólikpen 100 paıyz qamtamasyz etildi.
Keıingi jyldary 24 medıtsınalyq nysan kúrdeli jóndeýden ótkizildi, 15 mlrd. teńgege medıtsınalyq qural-jabdyqtar satyp alyndy. Jabdyqtalý deńgeıi 2022 jyly 83,2 paıyz bolsa, búginde bul kórsetkish 90,2 paıyzǵa jetti.