Qyzylorda oblysynyń ákimi túzeý mekemesiniń óndiristik aımaǵymen tanysty

QYZYLORDA. KAZINFORM — Aımaqtaǵy №60 mekemesinde 901 sottalýshynyń 821-i jumysqa jaramdy. Bul týraly Qyzylorda oblysynyń ákimdigi jarııalady.

Qyzylorda oblysynyń ákimi Nurlybek Nálibaev oblys prokýrory R. Ojarovpen birge qylmystyq atqarý júıesi departamenti №60 mekemesiniń jumysymen tanysty.

Mekemeniń óndiristik aımaǵynda 17 seriktestik bar. Jeke kásipkerlerdiń qoldaýymen 300-ge jýyq sottalýshy jumyspen qamtylǵan. Negizgi baǵyttary — temir buıymdaryn óndirý, aǵash ónimderin (astaý, tabaq, dombyra, sandyq, esik) daıyndaý, gazoblok, peskoblok, brýschatka, kúıdirilgen kirpish shyǵarý.

Arnaıy kontıngentti eńbekpen qamtý, jańa jumys oryndaryn ashý maqsatynda №60 mekeme aýmaǵyndaǵy bos jer ýchaskesine tez turǵyzylatyn modýldik ónerkásiptik angar salý máselesi kóterildi.

Jeke kásipkerlerdiń birine Qyzylorda oblysy prokýratýrasy, QAJ departamentiniń qoldaýymen, «Baıqońyr» áleýmettik-kásipkerlik korporatsııasy jáne respýblıkalyq ınnovatsııalyq ortalyqtyń baǵdarlamasy aıasynda qaıtarymdy nesıe rásimdeldi. Bul qarajatqa brýschatka óndiretin qondyrǵy ornatylyp, 15 sottalýshy jumyspen qamtyldy.

Taǵy bir seriktestikke óndiristik aımaqtan úı-jaı berilip, 20 tigin mashınasy ornatyldy. Onda 20 sottalýshy turaqty jumysqa tartyldy.

Sonymen qatar bas bostandyǵynan aıyrylǵandar túıequs, kúrketaýyq jáne basqa da qustardy ósirip, baptaýmen aınalysady.

Buǵan deıin aımaqta IV Ulttyq qaıyrymdylyq konferentsııasy ótti.