Qyzylorda oblysyndaǵy jalǵyz búrkitshi nemen aınalysyp júr
QYZYLORDA. KAZINFORM — Qyzylorda oblysy Jańaqorǵan aýdanynyń Ábdiǵappar aýylynda turatyn 25 jastaǵy Ǵalymjan Ómirtaı ulttyq sporttyń birneshe túrin meńgergen. Keıipkerimiz — jamby atýdan sport sheberi. Odan bólek, atbegilik pen qusbegilikke jany qumar.
Ǵalymjan Ómirtaı jamby atý, ıaǵnı at ústinde sadaq atýmen 2017 jyldan beri aınalysyp keledi. Bas jattyqtyrýshysy — óziniń ákesi, ulttyq sport janashyry Slamhan Boranbaev.
— Sporttyń bul túri attyń qulaǵynda oınaıtyn qazaq úshin asa qıyn deı almaımyn. Óıtkeni ol bizdiń qanymyzda bar. Jamby atýdyń jylqyny tizemen jáne dene qımylymen basqarý sııaqty ádis-tásili az emes. Ár sportshynyń ózine tán qupııasy da bar. At ústinde nysana kózdeý er jigittiń mergendik, eptilik qabiletin synap, namysyn janıdy, — dedi sportshy.
Keıipkerimiz 5 jyl qatarynan Qazaqstan quramasynyń sapynda bolǵan. Búginde Jańaqorǵan aýdanyndaǵy № 7 olımpıadalyq rezervtiń mamandandyrylǵan balalar men jasóspirimder mektebiniń jamby atý bóliminde jattyqtyrýshy.
Shákirtteriniń aldy dúbirli dodada top jaryp úlgerdi. Aqádil Pernebaı — Qazaqstan chempıony, Mońǵolııada ótken Álem chempıonatynyń qola júldegeri. Al Zańǵar Ashan bıyl Indonezııada ótken Álem chempıonatynda 3-orynǵa ıe boldy.
Ǵalymjan Ómirtaı dodaǵa qosatyn janýardy ózi baptaıdy. Olardyń árqaısysynyń jaıyn jaqsy biledi.
— Boıtumar esimdi eń alǵashqy sáıgúligim kókparda qorǵaýshy rolin atqardy. Ataǵy aımaqqa ǵana emes, respýblıkaǵa keńinen tarady. Qyzylordanyń «Qaısar» quramasynda 8 jyl óner kórsetti. Taǵy bir tulparymnyń jasy 12-de, 5 jasynda satyp alǵanmyn. Ózi qyzyl, boıy kishi jáne tompaq bolǵasyn Pomıdor dep atadym. Teńge ilýden Azııa kýbogynyń chempıony, Qazaqstan chempıonatynyń jeńimpazy. Shah esimdi tulparymnyń jasy nebári 4-te. Byltyr kóshpendiler oıynynda jamby atýdan chempıon atandy, — dedi ol.
Keıipkerimiz qusbegilikke den qoıǵaly shamamen 2 jyl. Qyzylordanyń aýa raıy qus tóresin ósirýge qolaısyz bolǵasyn bekzada ónerge ózinen basqa eshkim bettemeıtin kórinedi.
— Jamby atýdan qol bosaı bermeıdi, biraq búrkit baptaýdyń óz qıyndyǵy men qyzyǵy bar. Bir búrkit kúnine 500 gramm et jeıdi. Jattyǵý kezinde bul kólemdi azaıtýǵa týra keledi. Olardyń túzde júrgen kezdegi jaýyngerlik óneri týraly áńgime kóp. Mysaly, jemtigin ustaı almaǵanda qatty namystanady. Tipti jasy úlken keıbiri ózin ózi quzdan tastap jiberedi. Qanatyn qaǵyp, aman qalýǵa múmkindigi bola tura degeninen qaıtpaıdy. Qyran qustyń óz jaryn qalaı tańdaıtyny týraly málimet tipti qyzyq. Uıabasar búrkit jasy jetkende sańqyldap aspanda aınalyp ushyp júredi. Sháýli búrkitter aınalasyna jınalady. Uıabasar qus qolyndaǵy butaǵyn tastap jiberedi. Qaı búrkit ony jerge túse bergende qaǵyp alsa, sonymen uıa basady, ıaǵnı ol óziniń taǵdyryn myqty búrkitke tabystaıdy, — dedi búrkitshi.
Oblystaǵy jalǵyz qusbeginiń Muzbalaq jáne Semser esimdi búrkiti bar.
Buǵan deıin biz álem tanyǵan búrkitshi Aısholpan Nurǵaıyp Túrkistan oblysynda qusbegilik murajaıyn ashqanyn, jastardy atadan mıras bolyp kele jatqan bekzada ónerge baýlıtynyn jazǵanbyz.
