Qyzylorda oblysyndaǵy úsh tarıhı vokzal jańǵyrtýdan keıin qaıta ashyldy
ASTANA. KAZINFORM – Qyzylorda oblysyndaǵy Qazaly, Jańaqorǵan jáne Shıeli temirjol vokzaldary kúrdeli jańǵyrtýdan keıin paıdalanýǵa berildi, dep habarlaıdy Kólik mınıstrligi.
Qaıta jańǵyrtý jumystary aıasynda tarıhı vokzal ǵımarattary zamanaýı talaptarǵa saı jańartylyp, jolaýshylarǵa qolaıly ınfraqurylymmen jabdyqtaldy.
– 1903 jyly salynǵan Qazaly vokzaly tolyq jańǵyrtylyp, zamanaýı ınfraqurylymǵa ıe boldy. Ǵımarattyń jalpy aýdany 1 myń sharshy metrden asty. Stantsııa arqyly táýligine 24 jolaýshylar poıyzy qatynaıdy, – delingen vedomstvo aqparatynda.
1976 jyly salynǵan Jańaqorǵan vokzaly da tolyqtaı jańartyldy. Úsh qabatty ǵımarattyń aýdany 922,3 sharshy metrge deıin ulǵaıtyldy. Bul stantsııa arqyly Astana, Almaty, Qyzylorda, Aqtóbe, Kókshetaý, Mańǵystaý oblystary, Oral, Túrkistan, Petropavl qalalary, sondaı-aq Reseı men Ózbekstan baǵyttaryna qatynaıtyn 30 poıyz júredi.
– 1904 jyly paıdalanýǵa berilgen Shıeli stantsııasy da tolyq jańǵyrtýdan ótti. Ǵımarattyń aýdany 636,4 sharshy metrdi quraıdy. Stantsııa arqyly Almaty, Astana, Qyzylorda, Aqtóbe, Mańǵystaý oblystary, Oral, Kókshetaý, sondaı-aq Reseı, Ózbekstan jáne Qyrǵyzstan baǵyttaryna qatynaıtyn 26 jolaýshylar poıyzy ótedi, – dep málim etti mınıstrlik.
Aıta keteıik, Qazaqstanda jańǵyrtýdan keıin 30 vokzal iske qosyldy.
