Qyzylorda oblysyndaǵy sý aıdynyna aqqýlar oraldy
QYZYLORDA. KAZINFORM — Qyzylorda oblysynyń Jańaqorǵan aýdanyndaǵy sý qoımalaryna kóktemmen birge aqqýlar da ushyp keldi.
Áleýmettik jelide Jaıylma aýylyndaǵy gıdrotehnıkalyq nysanda qustyń tóresi júzip júrgen sát túsirilgen beınejazba keńinen tarady. Kóz súısindirerlik kórinis aýdan basshysy Majıt Samıtov sý qoımalaryn aralap, olardyń qazirgi ahýaly jáne kóktemgi sý tasqynyna daıyndyǵyn pysyqtaý barysynda obektıvke ilikken.
Jıdeli sý qoımasy burynnan «aqqýlar mekeni» degen ataýǵa ıe. Nysan 8,7 mln tekshe metr sý jınaı alady. Bógettiń uzyndyǵy — 863 metr, eni — 7 metr.
— Mundaı kóriniske Jamanbaı batyr aýyldyq okrýgindegi Besaryq aýylynyń turǵyndary da kýá bola alady. Eldi mekende úlken sý toǵany bar. Ol jerge de naýryz aıynan, ıaǵnı aýa raıy jylynǵannan bastap aqqýlar kele bastaıdy. Bul jylda qaıtalanady, — dedi aýdan ákiminiń baspasóz hatshysy Nurbol Bákirov.
Aýdanda Syrdarııa ózeniniń boıynda jáne Qarataý bókterinde ornalasqan birneshe mańyzdy sý qoımasy men kólder júıesi bar. Olar negizinen egin sýarýǵa, kóktemgi sý tasqynyn retteýge jáne aýyl sharýashylyǵyn sýmen qamtamasyz etýge arnalǵan.
Buǵan deıin Aqtaý qalasynan 10 shaqyrym qashyqta ornalasqan Qarakól kólinde aqpan aıynda 200-den astam aqqý qystap jatqanyn jazǵan edik.