Qyzylorda oblysyndaǵy eski temirjol beketi ǵımaraty synǵa qaldy

QYZYLORDA. KAZINFORM – Qyzylorda oblysy, Aral aýdanynyń Qamystybas eldi mekenindegi temirjol beketiniń surqy qashqan kórinis áleýmettik jelide tarap, jurtshylyqtyń synyna ushyrady.

Beınejazbada onyń ábden eskirgeni, kúrdeli jóndeýge suranyp turǵany keltirilgen. Óıtkeni vokzal ǵımaraty 1905 jyly Tashkent-Orynbor temirjolyn salý kezinde turǵyzylǵan. Qyzylorda oblysynyń jergilikti mańyzy bar tarıhı-mádenı eskertkishteriniń memlekettik tiziminde tur.

«Qazaqstan temirjoly» UK AQ beınejazbada kórsetilgen ǵımarat jergilikti atqarýshy organnyń ıeliginde ekenin, búginde ol dúkenge aınalǵanyn málimdedi.

– Jolaýshy tasymaldaý 2012 jyly salynǵan jolaýshylarǵa qyzmet kórsetý pýnkti bar basqa ǵımaratta júzege asyrylady. Aýmaǵy – 94,5 sharshy metr, oǵan qosa 12 adamǵa arnalǵan kútý zaly bar. Stansa arqyly 7 jup jolaýshylar poıyzy qatynaıdy, orta eseppen kúnine 15 jolaýshy jóneltiledi. Qazirgi jolaýshylar aǵymynyń esebine sáıkes ǵımaratta jolaýshylarǵa qyzmet kórsetý úshin qajet jaǵdaı jasalǵan, – delingen habarlamada.

Jergilikti ákimdik tarıhı-mádenı eskertkish sanalatyn nysandy jeke kásipker satyp alyp, dúkenge aınaldyrǵanyn atap ótti.

– Nysan kásipkerdiń menshigine ótken ýaqytta ǵımarattyń tehnıkalyq jaǵdaıy tolyq jaramdy kúıde bolǵan. Ǵımarattyń aınalasyndaǵy jáne oǵan kelýshilerge arnalǵan qaýipsizdik sharalaryn qabyldaý kásipkerdiń mindetine júktelgen. Ǵımarat jeke menshikte bolǵandyqtan nysandy buzý, qaıta jabdyqtaý – kásipkerdiń máselesi, – dep habarlady aýdandyq turǵyn úı kommýnaldyq sharýashylyǵy, jolaýshylar kóligi jáne avtomobıl joldary bólimi.

Buǵan deıin biz Qyzylorda oblysyndaǵy Qazaly temirjol vokzalyna jóndeý jumystary júrgiziletinin jazǵan edik.