Qyzylorda oblysyndaǵy balyq zaýyty qaldyqsyz ónim shyǵarady
QYZYLORDA. KAZINFORM – Qyzylorda oblysynda 11 balyq zaýyty bar bolsa, sonyń 9-y Aral aýdanynda ornalasqan.
Aýdan ákiminiń aqparatyna súıensek, bul zaýyttar negizinen teńiz baılyǵyn óńdep, daıyn ónimdi shet elderge eksporttaıdy. «Aral SDO» kásiporny shet memleketterge ónim jóneltýge quqyq beretin «Eýrokod» belgisin 2012 jyly alǵan.
- Reseıge tuzdalǵan ári keptirilgen maıda shabaq, al Polshaǵa tistiden fıle jóneltip, odan bólek Nıderland, Germanııa, Grýzııa jáne Qytaı sııaqty alys-jaqyn shet memleketterdi balyq ónimimen qamtyp otyr. Kásiporyn táýligine 16 tonna balyqty muzdatýǵa, 4,8 tonna fıle jáne steık, 1,6 tonna balyq farshyn shyǵarady. Sondaı-aq balyq óndirý, saqtaý, óńdeý, satý syndy turaqty jumys kestesi qalyptasqan, - delingen habarlamada.
Zaýyt qaldyqsyz ónim shyǵarýdy jolǵa qoıǵan. Tazalanǵan balyqtyń qabyrshaǵy men ishki qurylysyna deıin muzdatqyshta qatyryp, Shymkentke jiberedi. Ondaǵy kásiporynda balyq súıeginen maldyń jemi ázirlenedi.
Buǵan deıin habarlaǵanymyzdaı, elimizde jergilikti mańyzy bar 3 myńǵa jýyq sý aıdandarynda akvasharýashylyqty damytýǵa bolady.