Qyzylorda oblysyndaǵy Aqjarma eldi mekeni turǵyndary tabıǵı gaz tutyna bastady
QYZYLORDA. KAZINFORM — Búgin Qyzylorda oblysynyń ákimi Murat Ergeshbaev Syrdarııa aýdanyna jumys sapary kezinde Aqjarma aýylyna gaz qosý rásimine qatysty, dep habarlaıdy oblys ákiminiń baspasóz qyzmeti.
Saltanatty sharada aımaq basshysy aýyl turǵyndaryn kópten kútken ıgiliktiń iske asýymen quttyqtap, izgi tilegin bildirdi.
— Memleket basshysy aýyldarǵa ınfraqurylym jetkizýge erekshe kóńil bólip otyr. Búgin Sizder kópten kútken, aýyl halqynyń turmys-tirshiligine jańa tynys beretin tabıǵı gaz qosýǵa jınaldyq. Bul jobaǵa bıýdjetten 1,8 mlrd teńgeden astam qarjy bólindi. Ótken jyly Naǵı Іlııasov, Shaǵan aýyldaryna gaz qosylyp, el ıgiligin kórip jatyr. Aldaǵy ýaqytta da bul baǵyttaǵy jumystar jalǵasyn tabady. Egemen elimiz eńseli, Táýelsizdigimiz tuǵyrly bolǵaı! — dedi aımaq basshysy.
Rásimnen keıin aımaq basshysy aýyl turǵyndarynyń úılerine baryp, estelik syılyq tabystady.
Óńirde 2022 jyldan beri 65 mlrd. teńgeden astam qarjyǵa 77 gazdandyrý jobasy júzege asty. Nátıjesinde oblys halqyn gazdandyrý deńgeıi 83 paıyz boldy. Bıyl jyl sońyna deıin 10 eldi mekenge kógildir otyn qosylyp, qamtý deńgeıi 85 paıyzǵa jetkiziledi. Jaqyn kúnderi Syrdarııa aýdanyna qarasty Shirkeıli, Qoǵalykól jáne Besaryq aýyldaryn gazdandyrý bastalady.
Sapar barysynda aımaq basshysy Aqjarma, Shaǵan, Іńkárdarııa, Naǵı Іlııasov, Shirkeıli aýyldarynyń turǵyndarymen kezdesti. Onda aýdannyń áleýmettik-ekonomıkalyq damýy týraly aıtylyp, jınalǵan jurtshylyq usynys-pikirlerin ortaǵa saldy.
