Qyzylorda oblysyndaǵy 181 kól júıesine 881 mln tekshe metrden astam sý jiberildi

«Qazsýshar» RMK Qyzylorda fılıaly óńirdegi sý aıdyndary men tabıǵı aýmaqtardy saqtaý úshin jyl saıyn tabıǵatty qorǵaý baǵytynda sý jiberý jumystaryn júrgizedi.

Bıyl Jańaqorǵan aýdanyna 82,4 mln tekshe metr, Shıeli aýdanyna 72,3 mln tekshe metr, Qyzylorda qalasyna 73 mln tekshe metr sý baǵyttaldy. Sondaı-aq Syrdarııa aýdanyna 174,4 mln tekshe metr, Jalaǵash aýdanyna 166,2 mln tekshe metr, Qarmaqshy aýdanyna 72,4 mln tekshe metr sý jiberildi.

Qazaly aýdanyna 230,7 mln tekshe metr, al Aral aýdanyna 10 mln tekshe metr sý bólindi.

– Bul jumys Qyzylorda oblysynyń ekologııalyq tepe-teńdigin saqtaýǵa, jergilikti flora men faýnany qorǵaýǵa baǵyttalǵan. Qorshaǵan ortany saqtaý óńir turǵyndarynyń ómir súrý sapasyn jaqsartýǵa, mal sharýashylyǵy men sýarmaly eginshilikti, sondaı-aq óńir ekonomıkasyn damytýǵa yqpal etedi, – dedi QR Sý resýrstary jáne ırrıgatsııa mınıstrligi Sý resýrstaryn retteý, qorǵaý jáne paıdalaný komıtetiniń tóraǵasy Seıilbek Nurymbetov.

Qazirgi ýaqytta bekitilgen kestege sáıkes oblystaǵy 181 kól júıesine, sondaı-aq shabyndyqtar men jaıylymdarǵa sý jiberý jumystary jalǵasyp jatyr.

Jyl sońyna deıin ekologııalyq maqsatta taǵy shamamen 360 mln tekshe metr sý jiberý josparlanǵan. Osylaısha, jyl qorytyndysynda tabıǵatty qorǵaý maqsatynda baǵyttalǵan sý kólemi 1,2 mlrd tekshe metrden asýy múmkin.

Aıta keteıik, sý nysandaryn jańǵyrtýǵa frantsýz tehnologııalary tartylady.