Qyzylorda oblysyndaǵy 146 mal qorymynyń 57-si — qarapaıym shuńqyr
QYZYLORDA. KAZINFORM — Qyzylorda oblysynda mal ólekselerin tastaıtyn 146 mal qorymynyń bári birdeı talapqa saı emes. Sondyqtan asa qaýipti aýrýlardyń aldyn alý úshin óńirdegi barlyq eldi mekendi tıptik jobadaǵy qorymmen qamtamasyz etý máselesi sheshilip kele jatyr.
Oblystyq veterınarııa basqarmasynyń málimetinshe, 146 qorymnyń 89-y tıptik jobada bolsa, 57-si — qarapaıym shuńqyr.
— Asa qaýipti aýrýlardyń aldyn alý, epızootııalyq turaqtylyqty saqtaý maqsatynda aýyldyq okrýgterdi mal ólekseleri men bıologııalyq qaldyq tastaıtyn tıptik jobadaǵy mal qorymdarymen tolyq qamtamasyz etý qajet. Osyǵan baılanysty Aýyl sharýashylyǵy mınıstrligine usynys berdik. Nátıjesinde 2026-2027 jyldary tıptik jobadaǵy 145 mal qorymyn salý josparlandy. Ol úshin 3,5 mlrd teńge qarjy bólindi, — dedi basqarma basshysy Shahmardan Koıshybaev.
Oblystaǵy 57 sibir jarasynyń kómindisi talapqa sáıkes qorshaldy. Qaýipsizdik belgileri qoıylyp, memlekettik jer kadastrlyq nómiri alyndy. Oblystyq bıýdjetten 32,2 mln teńge bólinip, kómindilerdiń sanıtarlyq qorǵanysh aımaǵy belgilendi.
Al Aqtóbede mal ólekselerin kómetin oryn ázirleýge bıyl 686 mln teńge jumsalady.