Qyzylorda oblysynda júzge jýyq kóp balaly otbasy turatyn aýyl bar

QYZYLORDA. KAZINFORM — Qyzylorda oblysy Jalaǵash aýdanyna qarasty Eńbek aýylynda 100-ge jýyq kóp bala otbasy turady.

Aýylda 2,5 myń adam turady. Olardyń 43-i «Altyn alqa» ıegeri bolsa, 54-i «Kúmis alqaǵa» laıyqty dep tanylǵan. 

Aq jaýlyqty analar salt-dástúrge janashyrlyq tanytyp, jas urpaqqa ádet-ǵurypty nasıhattap keledi. 

Otbasynda 11 bala tárbıelep ósirgen Tazagúl Qazybekova jasynyń ulǵaıǵanyna qaramastan belsendiligimen kózge túsip keledi. Aýyldyq klýbta jas qyzdarǵa toqý úıretip, arnaıy úıirmesin júrgizedi. Sondaı- aq, erekshe zattardy toqyp, kópshiliktiń jyly yqylasyna bólenip júr. 

«Aýylda 18 balany tárbıelep ósirgen Sabyt pen Bátıma perzentteriniń barlyǵyn jaqsy azamat etip ósirdi. Olardyń balalary men nemereleri de kóp balaly ana», — deıdi Tazagúl Qazybekova.

Aýylda quraq kórpe isiniń sheberi atanǵan Aınur Dospanbetova 6 balanyń anasy. «Kúmis alqa» ıegeri kezinde quraq kórpe jasaýdy hobbı retinde bastasa, búginde ony bızneske aınaldyrǵan. Osy maqsatta beriletin 1 mln teńge aqshalaı grantqa óz isin ashypty.

«Bala kezimizden ájeler men analarymyzdan ulttyq salt-dástúrdi úırendik. Qaısybir kezeńde jún tútip, jip ıirý, jyly kıim toqý, kıiz úıge arnalǵan kilem men áshekeı jasaý kúndelikti jasalatyn jumystar edi. Qolóner buıymdaryn jasaý qazaq halqynda urpaqtan-urpaqqa berilip keledi», - deıdi ol.

Aýylda «Batyr analar» ájeler ansambli bar. Ol 35 jyl buryn qurylǵan. Qazir shyǵarmashylyq ujymda batyr analardan qurylǵan vokalısterdiń úshinshi býyny óner kórsetip júr.

Aýylda keıingi 7 jylda birde-bir quqyqbuzýshylyq tirkelmegen. Bul — qazynaly qarttar men aq jaýlyqty analardyń urpaǵyna durys tárbıe berýiniń bir kórinisi.

Sondaı- aq, Qyzylorda oblysynda úsh márte egiz bosanǵan ana turady.