Qyzylorda oblysynda jolda qalyp qoıǵan 4 myń jolaýshyǵa kómek kórsetildi
QYZYLORDA. KAZINFORM - Aýa raıynyń qolaısyzdyǵynan «Samara-Shymkent» avtomobıl jolynyń Qyzylorda oblysy aýmaǵynda turyp qalǵan jolaýshylarǵa kómek kórsetildi.
Aqtóbe oblysy aýmaǵyndaǵy aýa raıynyń qolaısyzdyǵyna oraı respýblıkalyq mańyzy bar «Samara-Shymkent» avtomobıl jolynyń 1240-1357 shaqyrymy aralyǵy tolyqtaı jabylǵan. Osyǵan baılanysty Qyzylorda oblysy aýdandar ynyń tusynda kólik qozǵalysy toqtatylyp, jolda qalǵan adamdarǵa tıisti kómek kórsetilýde.
Aral, Qazaly, Qarmaqshy, Jalaǵash, Syrdarııa, Jańaqorǵan, Shıeli aýdandary men Qyzylorda qalasynyń ákimdigi jolaýshylardy ornalastyryp, qajetti azyq-túlik pen dári-dármektermen qamtamasyz etýde.
Qyzylorda oblysyndaǵy kempıngterde 2636 avtokólik (2085 aýyr júk kóligi, 532 jeńil avtokólik, 19 jolaýshylar kóligi), 4410 jolaýshy toqtaǵan.
«Osyǵan baılanysty qala jáne aýdan ákimdikteri jol boıy servıstik keshenderinde azyq-túliktiń, janar-jaǵar maı, gazdyń jetkilikti bolýyn, al oblystyq kásipkerlik jáne ónerkásip basqarmasy Aral, Qazaly aýdandaryndaǵy maı jáne gaz quıý beketteriniń baǵany negizsiz ósirmeýin, jetkilikti deńgeıde bosatylýyn qatań qadaǵalaýda. Oblystyq bilim, sport, mádenıet basqarmalary jolaýshylardy jaqyn mańdaǵy jataqhanalar, sport keshenderine, klýbtarǵa ornalastyrý múmkindikterin qarastyrýda. Oblystyq densaýlyq saqtaý basqarmasy jedel járdem qyzmetiniń úzdiksiz jumysyn úılestirýde.Polıtsııa basqarmalary jolaýshylar ornalasatyn aýmaqtarǵa kezekshilik uıymdastyrýda. Jolaýshylar ystyq tamaqpen, taǵy da basqa turmystyq zattarmen qamtamasyz etildi. Qosymsha dári-dármek jáne medıtsınalyq kómek kórsetilýde. Barlyq keshende azyq-túlik, dári-dármek jáne aýyz sý jetkilikti. Jol boıyndaǵy jaǵdaı oblys ákimi Nurlybek Nálibaevtyń turaqty baqylaýynda tur», - dep málim etti Qyzylorda oblysy ákimdiginen.
Eske salsaq, budan buryn Aral jáne Qazaly aýdandarynda jolda qalyp qoıǵan jolaýshylarǵa kómek kórsetilgeni týraly habarlandy.
