Qyzylorda oblysynda jolda qalǵan jolaýshylarǵa kómek kórsetildi
QYZYLORDA. KAZINFORM — Aqtóbe oblysynyń aýmaǵyndaǵy qatty boranǵa baılanysty kesheden beri respýblıkalyq mańyzy bar M-32 "Samara-Shymkent" avtomobıl jolynyń 1240-1357 shaqyrymy aralyǵy jabylǵan.
Aqtóbe oblysynyń shekarasynan Aral qalasyna deıin barlyq kólik qozǵalysyna shekteý qoıyldy. Osyǵan oraı Aral qalasynan 20 shaqyrym qashyqtyqta jol patrýldik polıtsııanyń 12 ınspektory 6 avtokólikpen jol boıynda jumys jasaýda.
Búginde Aqtóbe oblysyna baǵyt alǵan 584 júk kóligi, 13 jolaýshylar kóligi, 210 jeńil kólik jáne 1000-ǵa jýyq jolaýshy toqtatyldy. Aýdan ákimdigi janynan arnaıy shtab qurylǵan. Jergilikti erikti jastar, mekemeler jáne kásipkerlerdiń, bilim salasy qyzmetkerleriniń uıymdastyrýymen jolaýshylarǵa tegin ystyq tamaq uıymdastyrylýda. Áıelder men balalar aýdan ortalyǵyndaǵy ındýstrıaldy- tehnıkalyq kolledj jataqhanasyna ornalastyryldy.
Medıtsına qyzmetkerleri eki mezgil jolaýshylardy aralap densaýlyǵyn tekserýde.
Jol boıyndaǵy qyzmet kórsetý keshenderindegi azyq-túlik pen tamaq baǵasy jergilikti ákimdiktiń udaıy baqylaýynda.
Sonymen qatar, 7 aqpannan bastap, Qazaly aýdanynyń Oıyndy eldi mekeni tusyndaǵy, "Mıras" keshenine 135 júk kóligi (fýra) men 35 jeńil avtokólik toqtatyldy. Kólikterde 200-ge jýyq adam bar. Jol polıtsııasy qyzmetkerleri joldyń jabyq ekenin túsindirdi. Narazylyq joq. Aýdan ákimdigi keshen basshylyǵymen kelissóz júrgizip, jolaýshylarǵa tamaq arzan baǵamen berilýde.
Dári-dármek, aýyz sý tegin úlestirildi. Azyq-túlik qory jetkilikti. Balaly jolaýshylarǵa keshenniń qonaq úıinen tegin jatyn oryndar daıyndaldy, kezekshilik qoıylǵan.
Tek Aral, Qazaly ǵana emes, barlyk aýdandarda jolaýshylarga aýdan ákimdikteri tarapynan tıisti kómek kórsetilýde. Jaǵdaı oblys ákimi Nurlybek Mashbekulynyń tikeleı baqylaýda. Boran basylyp, jaǵdaı turaqtalǵan soń avtokólikterge jol polıtsııasy jol bastap, saparyn jalǵastyrady.
Aýa raıynyń qolaısyzdyǵyna oraı jurtshylyqtyń jolǵa shyqpaýyn suraımyz.
