Qyzylorda oblysynda jol apatynyń sany 47,9% ósti
QYZYLORDA. KAZINFORM – Qyzylorda oblysynda keshendi profılaktıkalyq is- sharalardyń kúsheıgenine qaramastan ótken jyly jol-kólik oqıǵalarynyń sany 47,9% (978-den 1446-ǵa) ósti.
Odan 109 adam qaza taýyp, kórsetkish 5,8%-ǵa, jaraqat alǵandar sany 54,9%-ǵa (1247-den 1932-ge) artty.
- Taldaý nátıjesi kóbine júrgizýshilerdiń jol erejelerin saqtamaýy jol-kólik oqıǵalaryna ákeletinin kórsetti. Atap aıtqanda, jolda júrý erejesin buzýdyń 305 myńǵa jýyq deregi anyqtalsa, onyń 176 myńnan astamy — jol apatyna tikeleı áser etetin óreskel quqyqbuzýshylyqtar. Osyǵan baılanysty qaýip-qater joǵary ýchaskelerde, adamdar shoǵyry kóp jaıaý júrý ótkelderinde kezekshilikti kúsheıttik, - dedi oblystyq Polıtsııa departamentiniń bastyǵy Serik Ergeshov.
Óńirde jol qozǵalysy erejelerin buzýdy avtomatty túrde anyqtaıtyn statsıonarlyq júıe jelisi keńeıdi. Jaıaý júrginshilerdiń qaýipsizdigin qamtamasyz etý maqsatynda qosymsha 10 «Sunqar» qurylǵysy iske qosyldy.
- Odan bólek, beınebaqylaý qondyrǵylarynyń sany kóbeıdi. Qazirgi tańda oblys ortalyǵy men barlyq aýdandyq polıtsııa bólinisindegi jedel basqarý ortalyqtary 888 beınebaqylaý kamerasymen qamtylǵan. Shtattyq rejımde jumys istep tur. «Qaýipsiz qala» jobasy aıasynda oblys ortalyǵyna 1400 beınebaqylaý kamerasy, 20 zııatkerlik qıylys, 58 statsıonarlyq jyldamdyq ólshegish ornatyldy, - dedi departament bastyǵy.
Qazirgi kúni olardy iske qosý baǵytynda jumys atqarylyp jatyr.
Aıta keteıik, jýyrda Jetisý oblysynda jol apatynan 5 adam mert boldy.