Qyzylorda oblysynda joǵary surypty as tuzyn óndirý zaýyty ashyldy
QYZYLORDA. KAZINFORM - Búgin oblys ákimi Murat Ergeshbaev, oblys prokýrory Rızabek Ojarov, zııaly qaýym ókilderi men el aǵalary Aral qalasyndaǵy joǵary surypty as tuzyn óndirý zaýytynyń ashylý rásimine qatysty.
Aımaq basshysy turǵyndardy quttyqtap, óndiris ornynyń jumysyna sáttilik tiledi.
-Barshańyzdy joǵary surypty as tuzyn óndirý zaýytynyń resmı ashylýymen quttyqtaımyn! Sondaı-aq mańyzdy jobany Aral aýdanynda júzege asyrǵany úshin jeke ınvestorǵa zor rızashylyǵymdy bildiremin. Bul - elimizdiń eksporttyq áleýetin arttyratyn, jańa jumys oryndary ashylatyn mańyzdy joba. Óndiris oryndary ekonomıkany ártaraptandyrýǵa, turǵyndarymyzdyń ómir súrý sapasyn arttyrýǵa tyń serpin beredi dep senemin, - dedi Murat Nálqojauly.
«Toǵys - Aralotyn» seriktestigi joǵary surypty as tuzyn óndirý zaýytyna 1,8 mlrd. teńge qarjy salǵan, jyldyq qýaty 40 myń tonna. Munda 20 adam jumyspen qamtylady. Memlekettik qoldaý aıasynda 4 gektar jer telimi berilip, qajetti ınfraqurylym tartyldy. Zaýyt ónimderi ishki naryqty qamtamasyz etýmen qatar, kórshiles memleketterge de eksporttalady.
Sharada oblys prokýrory Rızabek Ojarov, el aǵalary Imamadın Ońǵarbaev, Nuraly Ospanov sóz sóılep, aýdannyń áleýmettik-ekonomıkalyq damýyna, zaýyttyń iske qosylýyna atsalysqan azamattarǵa oblys ákiminiń Alǵys haty tabystaldy.
