Qyzylorda oblysynda jylý berý maýsymy aıaqtaldy

QYZYLORDA KAZINFORM – Qyzylorda oblysynda 2025-2026 jylǵy jylý berý maýsymy kezeń-kezeńimen aıaqtaldy.

Oblystyq energetıka jáne turǵyn úı kommýnaldyq sharýashylyǵy basqarmasy habarlaǵandaı, 1 sáýirde Qyzylorda qalasy, Aral, Jańaqorǵan, 2 sáýirde Qarmaqshy, Jalaǵash, Syrdarııa aýdandary jylýdan ajyratyldy. Qalǵan eki aýdanda — Qazaly men Shıelide 5 sáýirde aıaqtalady. 

- Jylý berý maýsymynda 1079 áleýmettik nysan men ortalyq jylýǵa qosylǵan 909 qópqabatty turǵyn úı úzdiksiz jylýmen qamtamasyz etildi.

Oblys boıynsha tirshilikti qamtamasyz etýshi kásiporyndar shtattyq rejımde jumys istedi. Jylý syrtqy aýa temperatýrasyna sáıkes berildi.

Qazirgi tańda jylý jelileri men jylý energııa qazandyqtaryn temperatýralyq jáne gıdravlıkalyq synaqtan ótkizip jatyrmyz. 

Aldaǵy jylǵy jylý berý maýsymyn senimdi jáne turaqty qamtamasyz etý maqsatynda kásiporynnyń negizgi jáne qosalqy qondyrlyǵaryn jóndeý kestesi ázirlendi, - dedi basqarma basshysynyń mindetin atqarýshy Tahır Nádirbek. 

Energetıka mınıstrligi Atomdyq jáne energetıkalyq qadaǵalaý men baqylaý komıtetiniń oblystyq departamenti kúzgi-qysqy kezeń turaqty, shtattyq rejımde ótkenin málimdedi. 

- Tutynýshylar elektr jáne jylý energııasymen tolyq qamtamasyz etilgen. Elektr stantsııalary júıelik operator bekitken rejımge sáıkes jumys jasap tur. Ótken jyly energetıkalyq kásiporyndardaǵy jóndeý naýqany belgilengen merzimde jáne tıisti sapamen aıaqtaldy. Elektr stantsııalaryndaǵy tehnologııalyq buzýshylyqtar 57%-ǵa, elektr jelilerinde 5,5%-ǵa tómendedi, - dedi departament basshysynyń mindetin atqarýshy Turarbek Badaev. 

Jylý berý maýsymy qala ákiminiń sheshimine sáıkes byltyr 8 qazanda bastaldy.

Osy kezeńde Qyzylorda jylý elektr ortalyǵyna tıesili 20 avtonomdy blok-modýldi qazandyqtyń 18-i shtattyq rejımde jumys istedi. 

- Jylý berýdiń temperatýralyq rejımi bekitilgen temperatýralyq kestege sáıkes boldy. Sáýir men mamyr aralyǵynda qalanyń jylý júıeleri joǵary qysymdy synaqtan ótkiziledi. Endi aldaǵy jylý berý maýsymyna daıyndyqty bastaımyz, - dedi kásiporyn fılıalynyń dırektory Hasanǵalı Imanǵalıev. 

Buǵan deıin biz Almatyda jylý 3 sáýirde birtindep óshirile bastaıtynyn jazǵan edik.