Qyzylorda oblysynda Jeńis kúnine arnalǵan saltanatty shara ótti
QYZYLORDA. KAZINFORM - Qyzylorda qalasyndaǵy «Taǵzym» alańynda búgin oblys ákimi Nurlybek Nálibaevtyń qatysýymen «Uly Jeńis - urpaqqa amanat» atty saltanatty shara ótti. Oǵan aımaq jurtshylyǵy, tyl ardagerleri qatysty.
«Memleket basshysy Qasym-Jomart Toqaev «Biz búgingi beıbit ómirimiz úshin jeńimpaz aǵa býynǵa qaryzdarmyz. Olardyń óshpes erligi - keıingi urpaqqa úlgi-ónege. Maıdangerlerimiz jan aıamaı qorǵaǵan azattyq, ádildik, teńdik qundylyqtary biz úshin de myzǵymas temirqazyq bolyp qala beredi» dep erekshe atap ótken bolatyn. Soǵys jyldary Syr óńirinen 70 myń azamat maıdanǵa attanyp, onyń 30 myńnan astamy qaza tapty, habar-osharsyz ketti. Bıylǵy Jeńis merekesin óńirde 4 maıdanger qarsy alýda. Eki ǵasyrdyń, alapat soǵystyń kýágerleri, batyr atalarymyzǵa barsha Syr jurtshylyǵy atynan amandyq tileımiz, aldaryńyzda bas ıemiz», - dedi aımaq basshysy kópshilik aldynda.
Surapyl soǵys jyldary erlik kórsetken qaharmandar qurmetine bir mınýt únsizdik jarııalanyp, eskertkishke gúl qoıyldy.
Sondaı-aq, Jeńis kúni qarsańynda oblys ákimi Nurlybek Nálibaev Uly Otan soǵysynyń ardagerleri Tólegen Júnisov jáne Ábdirahman Báıtikovtiń úıine arnaıy baryp, Memleket basshysy Qasym-Jomart Toqaevtyń quttyqtaýyn tabystady.
«Biz Otan úshin ot keshken aǵa býynnyń eren erligi men eseli eńbeginiń arqasynda beıbit zamanda ómir súrip jatyrmyz. Óskeleń urpaq ardagerlerimizdiń dańqty joly men qaharmandyq shejiresin únemi úlgi tutady», - delingen Prezıdent quttyqtaýynda.
Ardagerlerge qurmet kórsetýge oblystyq máslıhat tóraǵasy Murat Tileýimbetov, oblystyq qoǵamdyq keńes tóraǵasy Árip Hojbanov, oblystyq ardagerler keńesiniń tóraǵasy Serik Dúısenbaev ta bardy.
Tólegen Júnisuly 1942 jyly qyzyl ásker qataryna qabyldanyp, Ýkraınany jaýdan azat etýde erliktiń erekshe úlgisin kórsetti. Berlınge deıin jetken maıdanger jeńisten keıin elge qaıtarylmaı, patrýldik qyzmet atqarǵan. 1946 jyly elge oralǵan soń óz aýylynda beıbit eńbekke aralasty. Temirjol salasynda jol monteri boldy. 1983 jyly zeınet demalysyna shyqqanǵa deıin Qyzylorda belgi berý jáne baılanys dıstantsııasynda eńbek etti.
Jaýyngerlik erligi úshin «І dárejeli Uly Otan soǵysy» ordenimen, «Germanııany jeńgeni úshin», «Za boevye zaslýgı», «Za otvagý», «KSRO qarýly kúshterine - 60 jyl», «KSRO qarýly kúshterine - 70 jyl» jáne beıbit kúnde «Eńbek ardageri», «Astanaǵa - 10 jyl» medaldarymen marapattalǵan. Búginde aqsaqal 2 qyz, 1 ulynan taraǵan 8 nemere, 2 shóbereniń atasy.
Al Ábdirahman Báıtikuly 1942 jyly Ashhabad qalasyndaǵy komandırler daıyndaıtyn kýrsqa túsip, ony aıaqtamastan maıdanǵa attanǵan. 1943 jyly Kýrsk doǵasynda aýyr jaraqat alyp, ІІ top múgedegi bolyp, 1944 jyly elge oralǵan. UOS jyldaryndaǵy kórsetken erligi úshin Keńes Odaǵynyń marshaly G.K. Jýkovtyń ІІ dárejeli medalimen, «Qarýly kúshterdiń 50 jyldyǵy» ordenimen, «Jeńiske 20, 30, 40, 55, 65, 70, 75 jyl», taǵy da birneshe medaldarmen marapattaldy.
1944 jyly soǵystan oralǵan soń «Kooperator» (keıingi ataýy «Komsomol») kolhozynyń qoı sharýashylyǵynda esepshi jáne zeınet jasyna deıin brıgadır bolyp jumys atqarǵan. Búgingi kúni 10 baladan taraǵan 30 nemere, 35 shóbereniń atasy.
Eske salsaq, soǵysta Syr eliniń 21 azamaty erligi men qaharmandyǵy úshin Keńes Odaǵynyń Batyry atandy. Al 20 myńnan astam jaýynger orden- medaldarmen marapattaldy.
Búginde aımaqta soǵysqa qatysýshylar men olarǵa teńestirilgen 3948 ardager bar. Merekede barlyǵyna bıýdjetten birjolǵy áleýmettik qoldaý kórsetildi. 4 ardagerge 2 mln 500 myń teńgeden birjolǵy áleýmettik kómek tólendi.
Sondaı-aq oblysta soǵysta qaza tapqan jaýyngerlerdiń 7 jesiri, soǵys kezinde jaralanǵan, kontýzııa alyp, mertikken nemese aýrý saldarynan qaza tapqan múgedek jubaıy ne zaıyby bar 4 adam turady. Uly Otan soǵysyna qatysýshylarǵa jáne soǵys kezinde alǵan jaraqat saldarynan múgedektigi bar adamdarǵa teńestirilgender sany 1894 adamdy quraıdy.
