Qyzylorda oblysynda janarmaı quıý beketinen órt shyqty
QYZYLORDA. KAZINFORM – Qyzylorda oblysy Aral aýdanyndaǵy janarmaı quıý beketinde órt boldy.
Oblystyq tótenshe jaǵdaılar departamentiniń málimetine súıensek, 17 shildede saǵat 11.43 shamasynda aýdandyq №3 mamandandyrylǵan órt sóndirý bóliminiń 101 arnasyna Aral qalasyndaǵy «Sinooil maı quıý beketinde» órt shyqqany týraly habarlama kelip túsken. Oqıǵa ornyna aýdandyq 3 mamandandyrylǵan órt sóndirý bóliminiń 3 negizgi órt sóndirý avtokóligi men 10 qyzmetker jumyldyrylǵan. Tilsiz jaý 12:00-de tolyq sóndirildi.
«Órt janar-jaǵarmaı materıaldaryna arnalǵan rezervýardyń janýynan paıda bolǵan. Zardap shekkender tirkelgen joq. Órttiń shyǵý sebebi anyqtalýda», - dep málim etti Aral aýdany ákimdiginen.
Eske salsaq, budan buryn Qyzylordada qurylys zattary dúkeninen órt shyǵyp, ondaǵy taýarlar túgel janyp ketti.
