Qyzylorda oblysynda Jańaqorǵan aýdanynyń ákimi taǵaıyndaldy
QYZYLORDA. KAZINFORM — Búgin Qyzylorda oblysynyń ákimi Murat Ergeshbaevtyń tóraǵalyǵymen Jańaqorǵan aýdanynda áleýmettik-ekonomıkalyq kórsetkishterge, kadrlyq ózgeristerge baılanysty aktıv otyrysy ótti.
Aımaq basshysy Jańaqorǵan aýdanynyń ákimi qyzmetin atqarǵan Samıtov Majıt Samıtulyna qajyrly eńbegi úshin oblystyń eń joǵary marapaty — Qyzylorda oblysynyń Qurmet gramotasyn jáne «Qyzylorda oblysynyń damýyna qosqan úlesi úshin» medalin tabystady.
Aýdannyń jańa ákimi Jarqynbek Ǵalymjan Jarqynbekulyn tanystyrdy. Jańadan taǵaıyndalǵan aýdan ákimine ınvestıtsııa tartý, salyq bazasyn keńeıtý, jańa jumys oryndaryn ashý, kásipkerlikti damytý jobalaryn iske asyrý jáne qoǵamdyq-saıası turaqtylyqty qamtamasyz etý boıynsha naqty ári nátıjeli jumys júrgizýdi tapsyrdy.
Aýdannyń jańadan taǵaıyndalǵan basshysyna barlyq resýrsty paıdalanyp, jańa jobalardy sapaly júzege asyrý týraly tapsyrma berildi.
Ǵalymjan Jarqynbekuly 1978 jyly Jańaqorǵan aýdanynda dúnıege kelgen. Qazaq memlekettik agrarlyq ýnıversıtetin agronomııa mamandyǵy boıynsha támamdaǵan.
Eńbek jolyn «Kazagreks» memlekettik kásipornynda bas maman retinde bastap, aýyl sharýashylyǵy salasynda túrli jaýapty qyzmetter atqarǵan.
2009-2021 jyldary oblystyq aýmaqtyq ınspektsııasynyń bólim basshysy, Qyzylorda qalalyq aýyl sharýashylyǵy jáne veterınarııa bóliminiń basshysy, Jańaqorǵan aýdany ákiminiń orynbasary boldy.
2021 jyldyń qańtar aıynan osy kúnge deıin Jańaqorǵan aýdandyq máslıhatynyń tóraǵasy qyzmetin abyroımen atqaryp keldi.
Buǵan deıin oblys ákimi oblys ákiminiń orynbasary laýazymyna taǵaıyndalǵan Nurıddın Amanquldy aımaq aktıvine tanystyrǵan edi.
