Qyzylorda oblysynda jańa mektep ashyldy
Oblys ákimi Nurlybek Nálibaev Qazaly aýdanyna jumys saparymen baryp, aýdan ortalyǵy Áıteke bı kentindegi 250 oryndyq mekteptiń ashylý rásiminde turǵyndardy quttyqtady. Іs-sharaǵa Májilis depýtattary Murat Ábenov, Marhabat Jaıymbetov, Murat Ergeshbaev qatysty, dep habarlaıdy Kazinform.
Aımaq basshysy óskeleń urpaqtyń jaıly mektepterde bilim alýy, qosymsha bilim berý uıymdarynda qabiletin shyńdaýy úshin alda atqarylatyn jumystardy atap ótti. Memleket basshysynyń tapsyrmasymen jas urpaqtyń ıgiligi jolyndaǵy sharýalarǵa basa mán beriletinine toqtaldy.
«Prezıdent bastamasymen «Jaıly mektep» ulttyq jobasy aıasynda oblysta 21 mektep salynady. Byltyr 10 mekteptiń qurylysy bastaldy. Bıyl taǵy 11 mekteptiń irgetasy qalanady. Onyń biri Qazaly aýdanynyń Janqoja batyr aýylynda boı kóterse, jaqyn kúnderi Áıteke bı kentinde taǵy bir mekteptiń qurylysy bastalady. Qyzylorda qalasynda quny 7 mlrd. 900 mln. teńgeni quraıtyn fızıka-matematıka baǵytyndaǵy 300 oryndyq jataqhanasy bar 400 oryndyq mektep-ınternat qurylysy qarqyndy júrgizilýde. Osy aptada Jańaqorǵan kentinde 300 oryndyq jańa mektep paıdalanýǵa beriledi. Jańaqorǵan jáne Shıeli aýdandarynda Oqýshylar úıi men Óner mektepteri boı kóteredi. Balalar men jasóspirimderdiń shyǵarmashylyǵyn shyńdaý maqsatynda oblys ortalyǵynan «Shyǵarmashylyq akademııasy» salynady.
Topyraǵyna uly tulǵalardyń kindik qany tamǵan Qazaly aýdanynyń óńir tarıhyndaǵy orny erekshe. Esimderi alty Alashqa belgili Janqoja batyr, kúlli Shyǵys jastaryna jetekshilik etken Ǵanı Muratbaev, jeztańdaı ánshiler Roza Baǵlanova jáne Mádına Eralıevadaı dańqty daryndardan kende emes. Aldaǵy ýaqytta osy bilim oshaǵynan jerles aǵa-ápkelerindeı bilimdi, talantty shákirtter shyǵatynyna senimimiz mol», – dedi aımaq basshysy.
Saltanatty is-sharada Májilis depýtaty Murat Ábenov qazalylyqtardy jańa bilim oshaǵynyń ashylýymen quttyqtap, sala ardageri Serik Qýanyshbaı bata berdi.
Ashylý rásiminde óńirdiń áleýmettik-ekonomıkalyq damýyna úles qosqan kent turǵyndary marapattaldy. Іs-shara sońynda qonaqtar mektep ǵımaratyndaǵy ashana, sport zaly, akt zaly, kitaphana jumysymen tanysyp, matematıka, tarıh kabınetterin aralap kórdi.
