Qyzylorda oblysynda jalaqy qaryzy 691 mln teńgeden asty
ASTANA. KAZIFORM — Qyzylorda oblysynda 36 myńnan astam azamattyń eńbek quqyǵy qorǵaldy.
Qyzylorda oblysynda prokýratýranyń aralasýymen myńdaǵan azamattyń eńbek quqyqtary qalpyna keltirilip, júzdegen mıllıon teńge kólemindegi jalaqy qaryzy óteldi.
Máselen, «Qyzylorda tazalyǵy» JShS-de 606 qyzmetkerge mamyr aıynyń jalaqysy ýaqytynda tólenbegen. Prokýrorlyq qadaǵalaý sharalary nátıjesinde jumysshylarǵa jalpy 106,3 mln teńge jalaqy berildi.
Shıeli aýdanynda da jalaqyǵa qatysty másele anyqtalǵan. Aýdandyq bilim bólimine qarasty 18 memlekettik jáne 65 jekemenshik balabaqshanyń 1365 qyzmetkerine 2026 jylǵy shilde aıynyń jalaqysy tólenbegen. Prokýratýranyń aralasýynan keıin 261 mln teńge kólemindegi bereshek óteldi.
Qarmaqshy aýdanynda 553 balabaqsha qyzmetkerine 25,4 mln teńge jalaqy qaryzy tólendi.
Sonymen qatar Qazaly aýdandyq kópbeıindi ortalyq aýrýhanasynyń ujymdyq sharttary zań talaptaryna sáıkestendirildi. Nátıjesinde kishi býyn qyzmetkerleriniń jyl saıynǵy eńbek demalysyna qosymsha 12 kún qosylyp, 220 adamnyń quqyǵy qalpyna keltirildi.
— Jalpy, jyl basynan beri oblys prokýratýrasy azamattardyń eńbek quqyqtaryn qorǵaý boıynsha 20 qadaǵalaý aktisin engizgen. Sonyń nátıjesinde 36,2 myń adamnyń quqyǵy qorǵalyp, onyń ishinde 9,9 myń adamnyń konstıtýtsııalyq quqyqtary qalpyna keltirilgen. Sondaı-aq 691,3 mln teńge jalaqy qaryzy óndirilip, eńbek zańnamasyn buzǵan 135 laýazymdy tulǵa jaýapkershilikke tartyldy, — deıdi prokýrorlar.
Budan buryn Shymkentte eńbek zańnamasyn buzýdyń 226 faktisi anyqtalǵanyn jazǵanbyz.
