Qyzylorda oblysynda zańsyz mazýt satqan eki kásipker jazaǵa tartyldy

QYZYLORDA. KAZINFORM - Qyzylorda oblysynda zańsyz mazýt satqan eki kásipker jazaǵa tartyldy.

Qyzylordalyq eki kásipker munaı ónimderin shyǵarý zańdylyǵyn rastaıtyn qujatsyz asa iri mólsherdegi mazýtty ıelengen. Olar zańsyz ónimderdi saqtap, ótkizip otyrǵan.

Zańsyz is barysynda Ý.N. qylmystyq quqyq buzýshylyqtan túsken múlikti mámileler jasaý arqyly qylmystyq jolmen alynǵan ózge múlikti zańdy aınalymǵa tartyp, ony zańdastyryp otyrǵan. Al sottalýshy J.E. jaýapkershiligi shekteýli seriktestiginiń basshysy qyzmetin atqarsa da, seriktesine mazýt ónimin zańsyz jolmen ótkizýge járdemdesken.

Bul maqsatta Qyzylorda oblysy boıynsha Ekonomıkalyq tergep-tekserý departamenti sotqa deıingi tergep-tekserý júrgizdi. Tekserý barysynda atalǵan eki azamattyń 2022-2023 jyldar aralyǵynda zańdy qujatsyz 1023 tonna «M-100» markaly mazýtty munaı ónimderin shyǵarǵany anyqtaldy. Onyń jalpy quny – 58 223 514 teńge.

Tergeý boıynsha Ý.N. QR Qylmystyq kodeksiniń 197-baby 4-bóliginiń 2-tarmaǵy, 218-baby 1-bóligimen kináli dep tanyldy. Oǵan 3 jyl bas bostandyǵynan aıyrý jazasy taǵaıyndaldy.

Al J.Ε. QR Qylmystyq kodeksiniń 63-baby 1-bóligine sáıkes, shartty túrde 3 jyl bas bostandyǵynan aıyryldy.

Olardyń árqaısysynan jábirlenýshilerdiń ótemaqy qoryna 69 myń teńge májbúrli tólem óndiriledi.

Eske salsaq, budan buryn Qyzylordada zeınetkerdi tonap ketken kúdikti ustaldy.