Qyzylorda oblysynda vegetatsııa kezeńine 3,25 mlrd tekshe metr sý lımıti bekitildi
ASTANA. KAZINFORM — Jyl basynan beri Qyzylorda oblysynda jalpy uzyndyǵy 71,5 shaqyrym bolatyn 15 kanal mehanıkalyq tásilmen tazartyldy. Sonymen qatar 29 gıdrotehnıkalyq nysanǵa jóndeý jumystary júrgizildi.
Sý resýrstary jáne ırrıgatsııa mınıstri Nurjan Nurjigitov Qyzylorda oblysynyń Syrdarııa aýdanynyń turǵyndarymen eseptik kezdesý ótkizdi. Kezdesýde Aral-Syrdarııa basseındik sý ınspektsııasy men «Qazsýshar» RMK oblystyq fılıalynyń basshylary óńirdegi sý sharýashylyǵy salasynyń qazirgi ahýaly jáne vegetatsııa kezeńiniń turaqty ótýin qamtamasyz etý baǵytynda atqarylyp jatqan jumystar týraly baıandady.
— Jyl basynan beri Qyzylorda oblysynda jalpy uzyndyǵy 71,5 shaqyrym bolatyn 15 kanal mehanıkalyq tásilmen tazartyldy. Sonymen qatar 29 gıdrotehnıkalyq nysanǵa jóndeý jumystary júrgizildi. 26 jyldan keıin alǵash ret uzyndyǵy 16,5 shaqyrym bolatyn «Jetikól» kanalynyń ýchaskesi men «Aqtam» kanalynyń saǵasy tazartylyp, 6 gıdrotehnıkalyq nysan jóndeldi, — delingen mınıstrlik habarlamasynda.
2025-2026 jyldary ınvestıtsııalyq baǵdarlama aıasynda jalpy uzyndyǵy 33,3 shaqyrymdy quraıtyn «Kelintóbe» magıstraldyq kanalynyń, R-12 jáne «Quraıly» kanaldarynyń ýchaskelerin tazartý jumystary aıaqtaldy. Budan bólek, 4 gıdrotehnıkalyq nysanǵa keshendi jóndeý júrgizildi.
2026 jylǵy vegetatsııa kezeńine Aral-Syrdarııa basseındik sý ınspektsııasy Qyzylorda oblysy úshin 3,25 mlrd tekshe metr kóleminde sý paıdalaný lımıtin bekitti. «Qazsýshar» RMK-nyń oblystyq fılıaly Sý resýrstary jáne ırrıgatsııa mınıstrligi ázirlegen bıllıng júıesi arqyly óńirdiń sharýalarymen sý berý jóninde 1010 elektrondy kelisimshart jasasty.
Bul kelisimsharttar 118 myń gektar egis alqabyn, onyń ishinde 70 myń gektar kúrish alqabyn sýmen qamtamasyz etýdi kózdeıdi. Búginde fılıal óńirdiń aýyl sharýashylyǵy qajettilikteri úshin 2,23 mlrd tekshe metr sý aldy.
Sýdyń «qara naryǵynyń» aldyn alý maqsatynda fılıal qyzmetkerleri kún saıyn egis alqaptaryn aralap, kásiporynmen kelisimshart jasasqan sý tutynýshylarǵa sýdyń jetkizilýin turaqty baqylaýda ustap otyr.
— Sýdy utymdy paıdalaný búginde tek Qazaqstan úshin ǵana emes, búkil álem úshin eń ózekti máselelerdiń birine aınaldy. Sý resýrstaryn ysyrapsyz ári barynsha tıimdi paıdalaný — tańdaý emes, qazirgi jaǵdaıdaǵy qajettilik. Osy maqsatta óńirde kanaldardy betondaý, sý únemdeý tehnologııalaryn engizýdi yntalandyrý jáne egis qurylymyn ártaraptandyrý jumystary júrgizilip jatyr. Memleket basshysynyń tapsyrmasyna sáıkes, ylǵaldy kóp qajet etetin daqyldardyń egis alqaby jyl saıyn qysqartylyp keledi, — dedi Sý resýrstary jáne ırrıgatsııa mınıstri Nurjan Nurjigitov.
Baıandamalardy tyńdaǵan mınıstr Syrdarııa aýdany turǵyndarynyń sýarmaly jerlerge sýdyń turaqty jetkizilýi, sý únemdeý júıelerin engizý jáne sý sharýashylyǵy ınfraqurylymyn damytýǵa qatysty qoıǵan suraqtaryna jaýap berdi.
Kezdesýden keıin mınıstr «Qazsýshar» RMK Qyzylorda fılıalynyń «Remvodproekt» óndiristik ýchaskesine bardy. Nurjan Nurjigitov fılıal basshylyǵymen kásiporynnyń materıaldyq-tehnıkalyq bazasyn jetildirý josparlaryn talqylap, óndiris ornynda eńbek etip jatqan mamandarmen áńgimelesti.
Aıta ketelik respýblıka boıynsha egistikti sýarýǵa shamamen 6 mlrd tekshe metr sý alynǵan edi.
