Qyzylorda oblysynda uzyndyǵy 266 shaqyrym jol jóndeýden ótkizilýde

ASTANA. KAZINFORM - Qyzylorda oblysynda bıyl uzyndyǵy 266 shaqyrymdy quraıtyn avtomobıl joldary, kósheler men kópir ótkelderi jóndeýden ótkizilýde.

Oblysta jergilikti mańyzy bar avtomobıl joldarynyń jalpy uzyndyǵy - 3 580,5 shaqyrym. Onyń ishinde 1 014,5 shaqyrymy respýblıkalyq, 555 shaqyrymy oblystyq, 2 011 shaqyrymy aýdandyq mańyzy bar avtomobıl joldary.

«Bıyl jol ınfraqurylymyn damytý úshin túrli jobalar ázirlenip, uzyndyǵy 266 shaqyrymdy quraıtyn avtomobıl joldary, kósheler men kópir ótkelderi jóndeýden ótkizilýde.

2024 jyly oblystyq jáne aýdandyq mańyzy bar avtomobıl joldarynyń jaqsy jáne qanaǵattanarlyq ındıkatorlyq kórsetkishiniń úlesin 92 %-ǵa jetkizý mejelengen. Qala aýmaǵyndaǵy kóshelerge qaıta jańǵyrtý jumystaryn júrgizilýde. Búginde oblys aýmaǵynda 212 eldi mekendi aýdan jáne oblys ortalyǵymen baılanystyratyn 205 avtobýs marshrýty uıymdastyrylǵan. Sondaı-aq Tashkent qalasyna halyqaralyq jáne Astana, Almaty, Shymkent, Jezqazǵan, Túrkistan, Saryaǵash, Aqtóbe jáne taǵy basqa qalalarǵa oblysaralyq 13 avtobýs marshrýty uıymdastyrylǵan. «Qorqyt Ata» áýejaıy arqyly aptasyna barlyǵy 30 reıs oryndalýda», - dedi oblystyq jolaýshylar kóligi jáne avtomobıl joldary basqarmasynyń basshysy Jánibek Syzdyqov.