Qyzylorda oblysynda uzyndyǵy 117 shaqyrym magıstraldyq sý qubyrynyń qurylysy aıaqtaldy
QYZYLORDA. KAZINFORM – Qyzylorda oblysynyń eń shalǵaı eldi mekenderiniń biri – Aqbasty aýylyna ortalyqtandyrylǵan aýyzsý júıesi jetkizildi. Bul týraly Sý resýrstary jáne ırrıgatsııa mınıstrligi habarlady.
Aral-Sarybulaq toptyq sý qubyrynyń Qosaman-Aqbastyǵa qosylatyn tarmaǵynyń qurylysy aıaqtaldy. Jumys nátıjesimen Sý resýrstary jáne ırrıgatsııa mınıstri Nurjan Nurjigitov arnaıy baryp tanysty.
Qurylys jumystary 2022 jyldyń qazan aıynda bastalǵan bolatyn. Búginde dıametri 225 mm bolatyn jalpy uzyndyǵy 117 shaqyrym magıstraldyq sý qubyry tolyq salynyp, sý sharýashylyǵy nysandarynyń eki alańy boı kóterdi.
Bul nysan Aral aýdanyna qarasty Aqbasty aýylyn ortalyqtandyrylǵan aýyzsýmen qamtamasyz etýge baǵyttalǵan. Bul eldi mekende búginde 400-ge jýyq adam turady. Buǵan deıin aýyl turǵyndaryna tirshilik nári 20 shaqyrym jerden sý tasıtyn kólikpen jetkizilip kelgen.
– Memleket basshysy azamattardyń aýyzsýǵa tolyq qoljetimdiligin qamtamasyz etýdi tapsyrǵan bolatyn. Búginde mınıstrligimiz osy baǵytta keshendi jumystar júrgizip jatyr. Kóptegen jyl boıy ortalyqtandyrylǵan aýyzsýmen jabdyqtaý máselesi Aqbasty aýylynyń turǵyndary úshin óte ózekti másele bolyp keldi. Qazir osyndaı jobalar elimizdiń basqa da aımaqtarynda júzege asyrylyp jatyr, – dedi Sý resýrstary jáne ırrıgatsııa mınıstri Nurjan Nurjigitov.
Sý resýrstary jáne ırrıgatsııa mınıstrligi 1,3 mln adamdy aýyzsýmen qamtý úshin 2,5 myń shaqyrymnan astam sý qubyrynyń qurylysyn jáne rekonstrýktsııalaý jumystaryn júrgizip jatyr. Elimizdiń 9 oblysynda barlyǵy 31 joba júzege asyrylyp jatyr: Aqmola, Atyraý, Almaty, Qyzylorda, Túrkistan, Batys Qazaqstan, Soltústik Qazaqstan, Mańǵystaý jáne Ulytaý oblystary.
Aıta keteıik, Qostanaı oblysynda qaıtarylǵan aktıvterge 279 shaqyrym sý qubyry salynady.