Qyzylorda oblysynda úsh temirjol vokzaly jańartyldy
ASTANA. KAZINFORM – Qyzylorda oblysyndaǵy Josaly, Tóretam jáne Aral teńizi stantsııalarynyń temirjol vokzaldaryn qaıta jańǵyrtý jumystary aıaqtaldy, dep habarlaıdy Kólik mınıstrligi.
Jańǵyrtý jumystary elimizdegi temirjol vokzaldaryn jańartý baǵdarlamasy aıasynda júrgizildi.
Úsh nysanda da qasbetter men shatyrlar, ishki úı-jaılar, ınjenerlik júıeler, perrondar jáne vokzal mańyndaǵy aýmaqtar jańartyldy. Energııa únemdeıtin terezeler men alıýmınıı vıtrajdar ornatylyp, ǵımarattar qajetti jabdyqtarmen jáne jıhazdarmen qamtamasyz etildi. Árleý jumystaryna otandyq óndiristiń materıaldary paıdalanyldy.
– Josaly stantsııasynyń eki qabatty vokzaly 1905 jyly salynǵan. Ǵımarattyń aýdany 628,8 sharshy metrdi quraıdy. Stantsııa arqyly Josalyny Qazaqstannyń iri qalalarymen, sondaı-aq Reseı, Ózbekstan jáne Qyrǵyzstanmen baılanystyratyn 22 jolaýshylar poıyzy ótedi, – delingen habarlamada.
Tóretam stantsııasyndaǵy eki qabatty vokzaldyń aýdany da 628,8 sharshy metr. Mundaǵy ortasha táýliktik jolaýshylar aǵyny 340 adamnan asady. Stantsııa arqyly 22 jolaýshylar poıyzy qatynaıdy.
1904 jyly salynǵan Aral teńizi stantsııasynyń vokzaly qaıta jańǵyrtýdan keıin 439,8 sharshy metrge deıin ulǵaıtyldy. Munda táýligine orta eseppen 640-tan astam jolaýshy qatynaıdy. Stantsııa arqyly Araldy Qazaqstan qalalarymen jáne kórshi eldermen baılanystyratyn 24 jolaýshylar poıyzy ótedi.
Qazirgi ýaqytta Qyzylorda oblysyndaǵy Tereńózek jáne Jalaǵash stantsııalarynyń vokzaldaryn jańartý jumystary jalǵasyp jatyr.
Aıta keteıik, elde 100 temirjol vokzalda qurylys-montaj jumystary aıaqtaldy.
