Qyzylorda oblysynda túıe sútinen qurǵaq untaq shyǵaratyn zaýyt iske qosyldy
QYZYLORDA. KAZINFORM - Búgin aımaq basshysy Murat Ergeshbaev, oblys prokýrory Rızabek Ojarov, zııaly qaýym ókilderi men el aǵalary Aral qalasyndaǵy túıe sútinen qurǵaq untaq shyǵaratyn zaýyttyń ashylý rásimine qatysty.
Saltanatty sharada oblys ákimi bul bastama óńirdiń óndiristik qýatyn nyǵaıtýǵa, áleýmettik-ekonomıkalyq damýyna oń yqpal etetinin atap ótti.
-Barshańyzdy aımaǵymyz úshin mańyzdy jobalardyń biri – túıe sútinen untaq shyǵarý zaýytynyń resmı ashylýymen quttyqtaımyn! Bul óńir ekonomıkasynyń damýyna tyń serpin, elimizdiń eksporttyq áleýetin arttyrýǵa, jańa jumys oryndaryn ashýǵa mol múmkindik beredi.
Memleket basshysy Qasym-Jomart Kemeluly: «Jańa ınvestıtsııalar eń aldymen elimizdegi zamanaýı ónerkásiptiń negizin qalyptastyrýǵa baǵyttalýy kerek», - degen bolatyn.
Osy rette aımaǵymyzda iri ınvestıtsııalyq jobalar sátti júzege asrylyp keledi. Sonyń biri - 3 mlrd teńgege salynǵan «Qazaq Kemel» kompanııasynyń túıe sútinen qurǵaq untaq daıyndaý zaýyty. Jalpy, elimizde túıe sútin óńdeıtin kásiporyndar bar bolǵanymen, ónerkásiptik deńgeıde qurǵaq untaq óndiretin zaýyttar óte az. Sondyqtan bul - biregeı ári mańyzdy bastama, - dedi Murat Nálqojauly.
Jylyna shamamen 400 tonna ónim óndiriletin bul zaýytta 23 adam turaqty jumyspen qamtylady. Túıe sútin qurǵaq untaqqa aınaldyrý úshin kúnine 20 myń lıtr sút qajet. Bul jergilikti turǵyndar úshin tıimdi bolmaq. Túıe sútin kúndelikti ótkizip, turaqty tabys tabady. Jergilikti ónimge suranysty arttyrý maqsatynda kelisimshart jasalyp, aldaǵy 10 jylda Qytaı naryǵyna eksporttalady. Memlekettik qoldaý aıasynda ındýstrııalyq aımaqtan 1 gektar jer telimi berilgen. Sondaı-aq «Ónerkásipti damytý qory» arqyly Qytaıdan qajetti tehnologııalyq jabdyqtardy satyp alýǵa 1,8 mlrd. teńge qarjy qarastyryldy.
Rásimde oblys prokýrory Rızabek Ojarov, el aǵalary Aıtbaı Kósherbaı, Ádilbek Aıymbetov sóz sóılep, aýdannyń áleýmettik-ekonomıkalyq damýyna úles qosqan jáne zaýyttyń iske qosylýyna atsalysqan azamattar oblys ákiminiń Alǵys hatymen marapattaldy.
Óńirde ekonomıkany ártaraptandyrý maqsatynda aldaǵy úsh jylda 1 trln. 900 mlrd. teńgege 48 ınvestıtsııalyq joba júzege asyrylyp, 10 myńnan asa jańa jumys orny ashylmaq. Bıyl 100 mlrd. teńgege 21 joba iske qosylady dep josparlanǵan.
