Qyzylorda oblysynda tumaýǵa qarsy 85 myńnan astam ekpe satyp alyndy
QYZYLORDA. KAZINFORM –Qyzylorda oblysynda 2026-2027 jyldardaǵy epıdemııalyq maýsymǵa daıyndyq aıasynda tumaýǵa qarsy vaktsınatsııa naýqany bastaldy. Ol úshin jergilikti bıýdjet esebinen 85 007 doza vaktsına satyp alyndy.
Ekpe, eń aldymen, medıtsınalyq baqylaýdaǵy, jasy alty aıdan asqan jıi aýyratyn, jetim jáne ata-anasynyń qamqorlyǵynsyz qalǵan balalarǵa, medıtsına qyzmetkerlerine, júkti áıelderge, sondaı-aq júrek-qan tamyry jáne tynys alý músheleriniń sozylmaly aýrýy bar turǵyndarǵa salynady.
- Qaýip tobyndaǵy azamattardyń qatarynda dıspanserlik esepte turǵan 45 030 eresek pen 22 901 bala bar. Budan bólek, 9 428 medıtsına qyzmetkeri, júktiliktiń ekinshi jáne úshinshi trımestrindegi 3 907 áıel, jetim jáne ata-anasynyń qamqorlyǵynsyz qalǵan 3 351 bala, 219 áskerı qyzmetshi jáne qarttar men múgedekter úıleriniń 171 turǵyny qamtylady. Satyp alynǵan vaktsına kólemi tirkelgen qaýip tobyndaǵy azamattardy 100% qamtýǵa jetkilikti. Tumaýǵa qarsy ekpe júrgizetin 169 kabınet uıymdastyrylǵan. Onyń 116-sy emhanalarda ornalasqan, - dedi oblystyq densaýlyq saqtaý basqarmasy basshysynyń orynbasary Maıa Mıranbaıqyzy.
Osy oraıda medıtsına qyzmetkerleri arnaıy daıyndyqtan ótip jatyr. Búginde 350 dáriger men 1 794 orta medıtsına qyzmetkeri oqydy. Epıdemııalyq maýsymǵa daıyndyq retinde dári-dármek pen medıtsınalyq quraldardyń qajet qory jasaqtaldy.
- Oblys boıynsha naýqastardy qabyldaýǵa arnalǵan 425 tósek-oryn ázir. Onyń 200-i oblystyq juqpaly aýrýlar aýrýhanasyna, 225-i aýdandyq aýrýhanalarǵa tıesili. Vırýsqa qarsy preparattar men qajet quraldardyń rezervi alǵashqy medıtsınalyq-sanıtarlyq kómek uıymdarynda keminde 10 naýqasqa, statsıonarlarda keminde 35 naýqasqa eseptelgen, - dedi departament ókili.
Eske salaıyq, Astanada 2026–2027 jyldardaǵy tumaý maýsymyna daıyndyq júrip jatyr. Bıyl qalaǵa tumaýǵa qarsy «Grıppol Plıýs» vaktsınasynyń 169 005 dozasy satyp alyndy.
