Qyzylorda oblysynda tumaý 3,3 ese tómendedi

Qyzylorda oblystyq sanıtarııalyq-epıdemıologııalyq baqylaý departamentiniń málimetinshe, maýsym barysynda tumaýdyń 9 jaǵdaıy anyqtaldy. Bul ótken jyldyń sáıkes kezeńimen salystyrǵanda 3,3 ese tómen.

— 2025 jyly osy merzimde tumaýdyń 30 jaǵdaıy tirkelgen bolatyn. Tumaý sanatyna jatpaıtyn vırýstardyń taralýyn anyqtaý maqsatynda 256 synama zertteldi. Zerthanalyq zertteý nátıjesinde rınovırýstyń 12, adenovırýstyń 16, paragrıpptiń 10 jáne bokavırýstyń 5 jaǵdaıy anyqtaldy. Aýrýdyń aldyn alýdyń eń tıimdi joldarynyń biri — vaktsınatsııa. Osy baǵytta oblysta ımmýndaý jumysy júrgizilip, búgingi kúnge deıin 69 256 adam tumaýǵa qarsy ekpe aldy. Vaktsınatsııa barysynda Reseıde óndirilgen «Grıppol plıýs» vaktsınasy qoldanylyp jatyr. Ásirese, sozylmaly aýrýlary bar azamattarǵa, medıtsına qyzmetkerlerine, júkti áıelderge, balalar men egde jastaǵy adamdarǵa tumaýǵa qarsy ekpe alýdyń mańyzy zor, — dedi departament basshysynyń orynbasary Álııa Ábdiqaıymova.

Mamandar turǵyndardy maýsymdyq vırýstyq ınfektsııalardan saqtaný sharalaryn qatań saqtaýǵa shaqyrady.

— JRVI men tumaýdyń taralý qaýpin azaıtý úshin ár turǵyn jeke gıgıena talaptaryn saqtaýy qajet. Qoldy sabynmen jıi jýý, bólmeni turaqty jeldetý, ylǵaldy tazalaý, adam kóp jınalatyn oryndarda saqtyq sharalaryn ustaný ınfektsııanyń aldyn alýǵa kómektesedi. Sondaı-aq durys tamaqtaný, jetkilikti uıyqtaý jáne dene belsendiligin saqtaý arqyly aǵzanyń qorǵanys qabiletin qoldaǵan jón, — dedi departament basshysynyń orynbasary.

Dárigerler aýrýdyń alǵashqy belgileri baıqalǵan, ıaǵnı dene qyzýy kóterilip, jótel paıda bolyp, tamaq aýyrǵan, muryn bitelgen nemese jalpy álsizdikti sezingen jaǵdaıda úıde qalyp, medıtsınalyq kómekke júginýge keńes beredi. Aýrý belgileri bar balalardy mektepke nemese balabaqshaǵa jibermegen jón. 

Buǵan deıin habarlaǵanymyzdaı, Pavlodar oblysynda 76 myń adam tumaýǵa qarsy ekpe aldy.