Qyzylorda oblysynda tozyǵy jetken sý qubyry máselesi qashan sheshiledi
QYZYLORDA. KAZINFORM – Qyzylorda oblysynyń soltústiktegi eki aýdanyn tirshilik nárimen qamtamasyz etip otyrǵan Aral-Sarybulaq toptyq sý qubyrynyń tozyp turǵany kópten aıtylyp júr.
Apatty jaǵdaı, ásirese, jaz mezgilinde jıileıdi. Oblystyq energetıka jáne turǵyn úı kommýnaldyq sharýashylyǵy basqarmasy máseleni sheshý baǵytynda qandaı jumys atqarylyp jatqanyn jetkizdi.
- Aral-Sarybulaq toptyq sý qubyry Aral jáne Qazaly aýdandarynyń 160 myńnan astam turǵynyn aýyzsýmen qamtyp otyr. Jalpy uzyndyǵy 238 shaqyrym sý qubyry 1986 jyly paıdalanýǵa berilgen. 80%-nyń tozyǵy jetken. Sonyń saldarynan sý qysymyna tótep bere almaı, apatty jaǵdaılar men jaryqtan ajyratý jıi tirkeletin boldy. Atalǵan nysannyń qos aýdanǵa ortaq jalǵyz sý kózi ekenin eskere kele, qubyrdyń ekinshi tarmaǵyn salý qajettigi týyndady. 2022 jyly oblys ákimdigi tarapynan toptyq sý qubyrynyń ekinshi tarmaǵyn salý boıynsha jobalyq-smetalyq qujattama ázirlendi, - delingen basqarma jaýabynda.
Joba quny – 43,7 mlrd teńge. Ótken jyly qurylys jumysyn bastaýǵa respýblıkalyq bıýdjetten 5,5 mlrd teńge bólinip, 23 shaqyrym sý qubyry jańǵyrtyldy. Qurylys bıyl da jalǵasady. Ol úshin 20 mlrd teńge kóleminde bıýdjettik ótinim usynylǵan.
Buǵan deıin Premer-mınıstr Oljas Bektenov Úkimet otyrysynda bıyl úsh birdeı toptyq sý qubyry qoldanysqa beriletinin málim etti.
