Qyzylorda oblysynda tórt kólik soqtyǵysyp, bes adam aýrýhanaǵa jetkizildi
Qyzylorda oblysynda aýa raıy qolaısyzdyǵy saldarynan tórt kólik soqtyǵysyp, bes adam aýrýhanaǵa jetkizildi, dep habarlaıdy Kazinform.
Búgin, 19 jeltoqsanda saǵat 13:18-de Aral aýdanynyń aýmaǵynda Qambash eldi mekeni tusynan ótip jatqan «Batys Evropa-Batys Qytaı» tas jolynyń boıynda jol kólik oqıǵasy tirkeldi. Sol ýaqytta kezekshilikten tys ýaqytta Qamystybas stantsııasy qutqarý bólimshesiniń bas qutqarýshysy Erbol Otarbaev jeke jumysymen Aral qalasyna bet alǵan edi.
«Jol boıyndaǵy kólik apatyn kózi shalǵan ol dereý kómek kórsetýge kiristi. Keıinnen 3 «Mercede-benz» markaly júk kóligi men «Daewoo-nexia» markaly jeńil kóligi aýa raıynyń qolaısyzdyǵynan jol apatyna ushyraǵany anyqtaldy. Saldarynan jeńil kóliktegi 4 adam qoldyń synýy, aıaq qaıyrylyp qalý, mı jaraqaty sekildi ártúrli jaraqat alǵan. Qutqarýshy olardyń qasyna jaqyndaǵanda kólik ishinde qysylyp qalǵan egde jastaǵy áıel azamatshany baıqap, ony syrtqa shyǵarýǵa kómektesti. Osy ýaqytta oqıǵa ornyna jetken qutqarý bólimshesiniń qutqarýshy-medbıkesi Ásııa Bazarbaeva zardap shekken azamattarǵa alǵashqy medıtsınalyq kómek kórsetedi. Erbol Otarbaev jeke kóligimen jaraqat alǵan 5 adamdy jaqyn eldi mekenindegi aýrýhanaǵa jetkizedi. Olar qazir dárigerlerdiń jiti qadaǵalaýynda», - dep málim etti Qyzylorda oblysy Tótenshe jaǵdaılar departamenti Órt sóndirý jáne avarııalyq qutqarý jumystary qyzmetinen.
Vedomstvo málimetinshe, jol-kólik oqıǵasy saldarynan aýdarylyp qalǵan 3 «Mercede-benz» markaly júk kóliginiń júrgizýshileri din aman. Júk kólikterin turǵyzý úshin qosymsha kómek kútilýde.
Eske salsaq, budan buryn 13-15 jeltoqsan aralyǵynda Qyzylorda oblysynda oqýshylar men stýdentterge sabaq onlaın ótkizildi.
