Qyzylorda oblysynda temirjol ótkelindegi keptelis máselesi qalaı sheshilip jatyr

QYZYLORDA. KAZINFORM — Qyzylorda oblysynyń bas shahary men barlyq aýdan ortalyqtary bir temirjoldyń boıynda ornalasqan.

Oblystyq jolaýshylar kóligi jáne avtomobıl joldary basqarmasynyń málimetinshe, aýdandar temirjoldyń eki jaǵyna shoǵyrlanyp, kólik qozǵalysy temirjol ótkelderi arqyly uıymdastyrylady. Al bul kúnniń qarbalas sátterinde kólik qozǵalysyn shekteıdi. Temirjol ótkelinde keptelis paıda bolady.

— Máseleni sheshý maqsatynda mamyr aıynda Aral qalasynda quny 3 mlrd
140 mln teńge, uzyndyǵy 940 metr aspaly kópir el ıgiligine tabystaldy. Shilde aıynda 1 mlrd 400 mln teńgege Jańaqorǵan kentindegi temirjol ústinen ótetin kópir paıdalanýǵa berildi. Túrǵyndar muny uzaq jyl kútken bolatyn. Al qazirgi kúni Qyzylorda qalasynda
4 mlrd 700 mln teńgege Janqoja batyr kóshesi arqyly ótetin temirjolasty avtojolynyń qurylysy qarqyndy júrip jatyr, — dedi basqarma basshysy Jánibek Syzdyqov.

Qarmaqshy aýdanynyń Josaly kentindegi temirjolústi kópiriniń qurylysy kelesi jyly bastalady. Onyń quny — 5 mlrd 500 mln teńge.

Buǵan deıin Astana qalasynyń kólik ınfraqurylymyn jaqsartý maqsatynda qalany aınalyp ótetin temirjol salynatynyn jazǵanbyz.