Qyzylorda oblysynda tekserýden keıin sý tarıfi tómendedi

QYZYLORDA. KAZINFORM – Qyzylorda oblysynda 2024 jylǵa arnalǵan kommýnaldyq kásiporyndardyń tarıftik smetalarynyń oryndalýyna taldaý júrgizilip, birqatar kásiporynnyń tarıfter quramyndaǵy kózdelgen kiristi tolyq kólemde maqsatty túrde paıdalanbaǵany anyqtaldy. 

UEM Tabıǵı monopolııalardy retteý komıtetiniń Qyzylorda oblysy boıynsha departamenti osyǵan baılanysty tutynýshylarǵa qarajatty qaıtarýǵa jáne tarıftik saıasattyń ashyqtyǵyn arttyrýǵa baǵyttalǵan ýaqytsha ótemdik tarıfterdi bekitti.

— Onyń ishinde oblys ortalyǵynda qyzmet kórsetetin «Qyzylorda sý júıesi» kommýnaldyq kásipornyna qatysty túzetý engizildi. Sý berý qyzmeti boıynsha negizsiz alynǵan kiris kólemi 49,3 mln teńge boldy. Atalǵan kásiporyn úshin 2026 jylǵy 1 mamyrdan 2027 jylǵy 30 sáýirge deıingi kezeńge ótemdik tarıf bekitildi. Sý berý tarıfi (taratý jelileri arqyly) QQS-syz tekshe metrine 107,73 teńgeni qurap, qoldanystaǵy 110,62 teńgemen salystyrǵanda 2,6%-ǵa tómendedi. 25%-ǵa deıin tómendeý deregi Aral aýdanynyń Sekseýil kentinde qyzmet kórsetetin «Aral tazalyǵy» kommýnaldyq kásipornynda tirkeldi. Taldaý qorytyndysy boıynsha sarqyndy sý burý qyzmeti boıynsha 3,1 mln teńge kóleminde negizsiz kiris anyqtaldy. Osyǵan baılanysty 2026 jylǵy 1 sáýirden 2027 jylǵy 31 naýryzǵa deıin ýaqytsha ótemdik tarıf engiziledi. Jańa tarıf — QQS-syz tekshe metrine 220,17 teńge, bul burynǵy 293,42 teńgemen salystyrǵanda 24,9%-ǵa tómen, — delingen habarlamada.

Buǵan deıin QR UEM Tabıǵı monopolııalardy retteý komıtetiniń Qyzylorda oblysy boıynsha departamenti taldaý nátıjesinde tabıǵı monopolııalar sýbektileri bekitken tarıftik smetanyń oryndalmaý faktilerin anyqtady.