Qyzylorda oblysynda taý-ken baıytý kombınatynyń qurylysy bastaldy
QYZYLORDA.KAZINFORM - Búgin Qyzylorda oblysynyń Jańaqorǵan aýdany Shalqııa kentinde «Liaoning Hongda Group» kompanııasy «Býrabaı-Jalǵyzaǵash» taý-ken baıytý kombınatynyń qurylysy resmı túrde bastaldy.
Oǵan oblys ákimi Murat Ergeshbaev, «Liaoning Hongda Group» kompanııasynyń bas dırektory Tan Tszıýgan qatysty.
Rásimde aımaq basshysy aýdan turǵyndaryn quttyqtap, jańa óndiris orny óńir ekonomıkasyna tyń serpin beretinin atap ótti.
-Kombınat qurylysynyń bastalýy – Syr óńiri úshin tarıhı oqıǵa. Bul – oblysymyzdyń ındýstrııalyq damýyna jańa serpin, ekonomıkany ártaraptandyrýǵa jáne jańa jumys oryndaryn ashýǵa mol múmkindik beretin iri ınvestıtsııalyq joba.
Osyndaı aýqymdy ári zamanaýı jobany aımaǵymyzda júzege asyrǵan «Liaoning Hongda Group» kompanııasyna zor rızashylyǵymdy bildiremin.
Memleket basshysy Qasym-Jomart Kemeluly elimizdi jańa ınvestıtsııalyq tsıklge kóshirý, zamanaýı óndiristerdi iske qosý jáne óńirlerdiń ekonomıkalyq áleýetin tıimdi paıdalanýdy tapsyrǵan bolatyn.
Búgingi taý-ken baıytý kombınaty – osy aýqymdy jumystardyń asa mańyzdy bóligi. Qurylysyna 138 mlrd teńge qaralǵan joba tolyq iske qosylǵanda jylyna 210 myń tonna qorǵasyn-myrysh shıkizatyn jáne 20 tonna kúmis óndirý josparlanyp otyr. Eń bastysy, 550-den astam jańa jumys orny ashylady.
Búgin bastalyp jatqan qurylys sátti aıaqtalyp, merziminde iske qosylyp, el ıgiligine qyzmet etetinine senemin, – dedi Murat Nálqojauly.
Sharada kompanııa dırektory Tan Tszıýchan, el aǵasy Izadılla Nárzildaev sóz sóıledi.
Taý-ken baıytý kombınatyn aldaǵy eki jyl ishinde salyp, 2028 jyly tolyq aıaqtaý josparlanǵan.
Qazirgi ýaqytta ken ornynyń mıneraldyq-shıkizat bazasyn keńeıtý maqsatynda burǵylaý jumystary júrgizilip jatyr. Sondaı-aq óndiristik joldar salý da qolǵa alynyp, qurylys alańdary anyqtaldy. Budan bólek, elektr jelilerine qosylýǵa joba-smetalyq qujattama ázirlendi.
Qazirgi ýaqytta nysandy elektr qýatymen qamtamasyz etý jáne elektr jelilerine qosý mejelengen.
