Qyzylorda oblysynda sońǵy eki jylda 20 oıynhananyń qyzmeti toqtatyldy

Qyzylorda oblysy boıynsha ekonomıkalyq tergep-tekserý departamentiniń yqpalymen sońǵy eki jylda 20 oıynhananyń qyzmeti toqtatyldy, dep habarlaıdy Kazinform.

Sońǵy eki jylda óńirde departament yqpalymen 20 oıynhananyń qyzmeti toqtatyldy. Zańsyz oıyn bıznesin uıymdastyrǵan azamattar zań sheńberinde jaýapqa tartyldy. Sondaı-aq qarjy pıramıdasymen aınalysqan Q-Net uıymyna sotqa deıingi tergep-tekserý jumystary júrgizilip, jábirlenýshilerge qomaqty qarjysy tolyǵymen qaıtaryldy. 

«Óńirde zańsyz oıyn bıznesin toqtatý maqsatynda tıisti sharalar júrgizilýde. Sonyń biri — áleýmettik jeli arqyly ońaı olja usynatyn jarnamalyq saıttar men siltemelerdi anyqtaý. Bul maqsatta aqparattyq júıe arqyly tekseris jasaldy. Nátıjesinde jeli arqyly taralǵan 220 silteme buǵattalyp, 2 myń adam zańǵa qarsy kontentten bas tartty, al 3 akkaýnt joıyldy», — dep málim etti Qyzylorda oblysy boıynsha ekonomıkalyq tergep-tekserý departamentiniń basshysy Baqyt Qaıshybekov.

Kásipkerlik sýbektileri arasynda qylmys pen quqyq buzýshylyqty azaıtý maqsatynda «Bıznesti qorǵaý» jobasy júzege asyrylýda. Bul joba kásipkerlerdiń quqyqtaryn qorǵaýǵa jáne negizsiz qylmystyq qýdalaýǵa ushyramaýǵa baǵyttalǵan. 

«Osy jobanyń arqasynda bıyl azamattardyń konstıtýtsııalyq quqyqtaryn buzý faktisi bolǵan joq. Departamenttiń negizgi qyzmeti boıynsha jyl basynan beri 14 is óndirispen aıaqtaldy. Sáıkesinshe, memleketke keltirilgen zalal óndirildi. Al munaı ónimderin zańsyz aınalymyna qatysty 6 istiń óndirisi aıaqtalyp, sotqa joldandy. Osy rette turǵyndardyń qarjylyq saýattylyǵyn arttyrý maqsatynda oblystyq qoǵamdyq damý basqarmasymen birlesip, aýdandarda kezdesýler ótkizilýde», — dedi departament basshysy.

Eske salsaq, budan buryn Qyzylordada quny 1,7 mlrd teńge bolatyn 4 memlekettik satyp alý konkýrsynyń kúshi joıyldy.