Qyzylorda oblysynda shomylýǵa ruqsat etilgen oryndar belgili boldy
QYZYLORDA. KAZINFORM – Ótken jyly Qyzylorda oblysynyń sý aıdyndarynda 26 adam kóz jumdy, onyń 11-i – balalar. Tótenshe jaǵdaı retinde 5 oqıǵa tirkeldi.
Oblystyq Tótenshe jaǵdaılar departamentiniń málimetinshe, bıyl jyl basynan beri 4 adam sýǵa ketip qaıtys bolsa, onyń 1-eýi — bala. 2 oqıǵa tótenshe jaǵdaı retinde esepke alyndy.
- Sýdaǵy qaıǵyly jaǵdaılar negizinen qaýipsizdik erejelerin óreskel buzǵannan bolady. Onyń bir sebebi — ózen, kanaldardyń kez kelgen ári zerttelmegen, ıaǵnı aǵysy jyldam, tereń, jaǵasy tik jar jerine sýǵa túsý. Osy oraıda Qyzylorda oblysynda 9 jaǵajaı belgilengenin qaperge salamyz. Olar — Aral aýdanynda Aqqumshyq, Qarmaqshy aýdanynda Muratbaev, Syrdarııa aýdanynda Qalǵandarııa, Shıeli aýdanynda Báıgequm, Qyzylorda qalasynda Syr tolqyny, Edelveıs jáne Syr samaly, Jańaqorǵan aýdanynda Boryqtaı, Jalaǵash aýdanynda Asar jaǵajaılary. Bıyl sonyń tek 7-eýi jumys isteıdi. Oblys ortalyǵyndaǵy Syr samaly jeke jaǵajaıy bıyl jumys istemeıdi. Al Jańaqorǵandaǵy Boryqty jaǵajaıy qaýlyda bekitilgenimen áli ashylǵan joq, - delingen departamenttiń habarlamasynda.
Sýǵa shomylýǵa tyıym salynǵan qaýipti sý aıdyndaryndaǵy 63 aımaqqa 398 eskertý taqtaıshasy ornatyldy. Qaýipti aımaqtarda ornatýǵa ońaı (trafaret) jáne ózindik quny tómen tyıym salý belgileriniń ınnovatsııalyq túri qoldanylyp jatyr. Joǵaryda atalǵan 63 aımaqqa 20 mobıldi post ornatyldy.
Buryn habarlaǵanymyzdaı, Shymkentte shomylýǵa tyıym salynǵan 13 ýchaske anyqtaldy.
